Агенцијата за национална безбедност тврди дека открила пропагандна мрежа во Македонија која работи „во функција на руските интереси“. Мрежата, според АНБ, не се крие во темна соба, туку на интернет, зад клонирани псевдопортали регистрирани со македонски домени.

„Преку овие псевдо-портали се шират лажни вести, дезинформации и се врши преобликување на наративи за актуелни настани, со што се поткопува довербата во институциите и се поттикнува етничка и национална омраза и нетрпеливост“, соопшти Агенцијата.

Што всушност соопшти АНБ

Конкретно, на 18 септември, во координација со МВР и Јавното обвинителство, преземени се истражни дејствија против македонски државјанин „надоврзан на странски фактори кои се креатори на пропаганден апарат со мрежа на портали“. Во неговиот дом е извршен претрес, а одземените предмети се вештачат. Сомнежите се за три кривични дела: предизвикување национална, расна и верска омраза, раздор и нетрпеливост, одавање службена тајна и ширење расистички и ксенофобичен материјал по пат на компјутерски систем.

АНБ не објави ниту едно име, ниту на лице, ниту на портал. Не објави ни детали за тоа кој ја финансира мрежата и како е поврзана со, како што вели, „регионални проруски политички структури“. Најмистериозно е одавањето службена тајна: кој имал тајна да одаде, и од каде ја добил?

Трагата од летово

Агенцијата вели дека ова е продолжение на случајот од 4 март, кога 30-годишен Скопјанец беше пријавен за ширење ксенофобичен материјал преку фејсбук-страницата „Историски податоци за Македонија“ и печатење пропаганден материјал. Тогаш институциите наведоа дека го поттикнувал бугарски државјанин, а во јавноста како поттикнувач се спомена Виктор Стојанов, претседател на бугарската Фондација „Македонија“ од Софија, кој има забрана за влез во земјава.

Новинарско истражување објавено во јули покажа најмалку пет фејсбук-страници на македонски јазик управувани од Бугарија, кои преземале содржини од пет портали регистрирани во Македонија и еден од странство, сите со речиси идентичен дизајн. Странскиот портал, според тоа истражување, е адресно и капитално поврзан со Фондацијата „Македонија“, а дел од контакт-адресите депонирани при регистрацијата на македонските домени се адреси на истата фондација. Описот во денешното соопштение на АНБ речиси целосно се совпаѓа со тој модел.

Стојанов на ваквите тврдења реагираше уште во јули, кога се дозна дека институциите истражуваат дваесетина онлајн медиуми. Во соопштение преку бугарската агенција БТА ги нарече „лажни истраги насочени против независните граѓански медиуми“, со цел властите да можат да ги апсат и кривично да ги гонат нивните уредници и новинари. Мрежа за која АНБ вели дека работи во функција на руските интереси, се брани со речникот на слободата на медиумите. Балканот има видено и почудни маски.

Претресот беше пред две седмици, а соопштението стигна дури сега – без ниту едно име на портал. Ако државата знае што се, каде се регистрирани и што шират, зошто читателите сè уште не знаат кои се? И кога АНБ ќе каже кој стои зад нив, со име и презиме?