Илијана Јотова ја повтори формулата што Скопје ја слуша со години. Во Благоевград, на одбележувањето на 114-годишнината од она што во Бугарија го викаат ослободување на Горна Џумаја, бугарската претседателка рече дека Софија е „секогаш отворена за разговори“, но „без ултиматуми и без отстапки од европската политика“. А потоа ја кажа и поентата, упатена директно до премиерот Христијан Мицкоски: тој „мора многу добро да ја прочита европската политика“ за проширувањето и да заборави дека ова е билатерално прашање.

Тука почнува парадоксот. Македонското Министерство за надворешни работи во петокот испрати барање за билатерална средба меѓу министрите Тимчо Муцунски и Велислава Петрова-Чамова, која би се одржала на маргините на министерскиот состанок за Коридорот 8. Одговорот од Софија засега не стигнува по дипломатски пат, туку преку микрофони: на разговор сме подготвени, само Скопје прво да прифати дека разговорот не е билатерален. Билатерална средба за прашање што не смее да се нарече билатерално – тоа е европската политика што Скопје треба „многу добро да ја прочита“.

Јотова сама рече дека од својата министерка сака точно да го види текстот на нотата и како е формулирана. Нотата, значи, допрва ќе ја чита. Условите за разговорот, сепак, веќе ги знае.

Отиде и чекор понатаму. Рече дека не ги знае деталите од разговорот во четири очи меѓу Мицкоски и претседателката на Европската комисија Урсула фон дер Лајен, но се надева дека овој пат таа била „исклучително цврста“. Порача и дека пред сè треба да се реши случајот со Ива Михајлова, за кој Бугарија, според неа, се обратила до „највисоките европски и светски институции“. И додаде дека земја што тргнала по европскиот пат не смее „да зборува со ултиматумски тон“.

Кога Софија поставува услови пред средбата, тоа е „европска политика“. Кога Скопје бара средба, тоа е ризик од ултиматум. Колку пати треба да се одигра оваа сцена за да престане да се нарекува дијалог?

Мицкоски, од своја страна, вели дека не е задоволен од пораката на Фон дер Лајен за уставните измени, иако средбата ја оцени како пријателска и корисна. Доколку Бугарија ја одбие средбата, рече тој, уште еднаш ќе се потврдат тезите на Владата – но според него не би било паметно Софија да ја отфрли понудата. Политичкиот аналитичар Синиша Пекевски е поскептичен: „Реално е добро што ќе се разговара, ама напредок не очекувам, нивните барања се фиксни и нема да отстапат од тоа.“

Следната станица е извештајот за напредокот на Македонија, кој според Јотова Европската комисија ќе го разгледа за околу две недели. До тогаш – нота чиј текст Јотова допрва сака да го види, услови што се веќе напишани и „умерен оптимизам“ од страната што ги пишува.