Прилеп со регионална награда за циркуларна економија, градоначалникот вели дека 49% од граѓаните селектираат отпад од пакување

Општина Прилеп ја доби наградата „Municipal Circular Leadership Award 2026“, признание за општинско лидерство во циркуларната економија. Според градоначалникот Дејан Проданоски, меѓународното жири го избрало Прилеп за најуспешен во оваа категорија на ниво на Западен Балкан, во конкуренција од 63 апликации. Наградата е доделена на настан во Приштина.

Главниот аргумент на општината е една бројка: 49 проценти од граѓаните веќе селектираат отпад од пакување во своите домови. „Тоа се илјадници домаќинства, илјадници лични одлуки и еден град што чекори кон почиста и поодржлива иднина“, порача Проданоски.

Бројката е импресивна, ако издржи проверка. Од објавите не е јасно како е измерена – со анкета, со податоци од собирањето или со проценка. А разликата е голема. Едно е граѓанинот да ја одвои пластиката во посебна кеса, друго е таа кеса да не заврши во камионот заедно со останатиот отпад.

Општината најавува продолжување на работата на инфраструктура за секундарна селекција со капацитет до 10 тони на час, систем за собирање и раздвојување различни видови отпад, решенија за компостирање и третман на градежниот шут, како и рекултивација на постојната депонија. Тоа се вистинските мерила: кога линијата ќе профункционира, колку тони ќе поминат низ неа и колку помалку отпад ќе заврши на депонијата.

„Отпадот не мора да биде крај на еден процес, туку почеток на нова вредност“, вели Проданоски. Добра реченица за плакета. Дали ја потврдуваат и тоните, ќе покаже депонијата.