Apple им испрати недвосмислена порака на девелоперите: место на App Store повеќе не се добива засекогаш. Во освежените правила за рецензија на апликации, компанијата предупредува дека апликации од „добро етаблирани категории” може да бидат отстранети ако не се „ажурирани, подобрени или не привлекуваат корисници”.

Досега правилата само одбиваа нови копии – со легендарната формулација дека App Store „има доволно апликации за прдење, подригнување, батериски ламби, гатање, состаноци, игри со пиење и Кама Сутра”. Новата верзија оди чекор подалеку: на списокот сега се и тапетите, едноставните тајмери и звучните ефекти, а девелоперите се предупредени да не прават „опортунистички варијанти на постојни категории или популарни апликации”. Нова апликација од тие категории ќе помине само ако нуди „суштински поинакво или подобрено” искуство.

Времето на објавата не е случајно. На WWDC компанијата претстави персонализирани препораки и алатки за промоција – а препораките вредат повеќе ако ѓубрето е исчистено. Помалку мртви апликации значи поголема видливост за квалитетните. Логично. Но вреди да се каже и другата половина: Apple е единствената врата кон iPhone корисниците, и таа врата сега може да се затвори и за апликација што некогаш била уредно одобрена. Кој дефинира што значи „не привлекува корисници”? Apple. Кој нема жалбена инстанца? Девелоперот.

Компанијата тврди дека постојниот процес за подобрување на App Store ги известува девелоперите кога апликацијата им е застарена или потфрла, па имаат шанса да ја поправат пред да летне. А оние што упорно праќаат „нискоквалитетни” и „мрзеливи” апликации ризикуваат да го изгубат пристапот до целата девелоперска програма. Прочистен излог, поцврста рака – се менува излогот, но газдата на дуќанот останува ист.