Возилата без возач блокираат брза помош и пожарникари: регулаторот бара решение до крајот на месецот

Автомобилите без возач требаше да бидат посигурни од луѓето. Но што се случува кога тие „посигурни” возила ќе се исправат пред пожарникар со шмркот в рака – и едноставно не разберат што гледаат? Американскиот регулатор за безбедност во сообраќајот, NHTSA, испрати јасно барање до компаниите што прават автономни возила: најдете решение за овој проблем, и тоа до крајот на месецот.

Причината не е хипотетичка. Регулаторот документираше образец во кој возилата без возач влегувале во активни итни интервенции, блокирале брза помош и пожарникари, и не препознавале трепкачки светла, дим, оган, пламени сигнали и сообраќајни конуси. „Неспособноста да се откријат и соодветно да се одговори на вакви ситуации претставува функционален недостаток”, напиша директорот на NHTSA, Џонатан Морисон. Со други зборови – возилото не знае што е итен случај.

Претходно истражување идентификуваше најмалку шест случаи до март 2026 кога итните служби морале рачно да поместат возила на Waymo за да поминат – вклучувајќи еден за време на интервенција при масовно пукање и друг кога возилото блокирало пристап до експлозија на природен гас. Waymo одби да коментира. Компаниите не беа именувани во писмото, но деталите не оставаат многу простор за нагаѓање.

Најоштрата реченица од регулаторот е и најважната: „Итните интервенции не се ретки или екстремни гранични случаи.” Токму тука пука митот за автономните возила. Индустријата со години ги нарекува ваквите ситуации „edge cases” – редок раб на веројатноста што системот ќе го научи со време. NHTSA сега вели дека не се раб на ништо, туку секојдневие на секоја улица. И додаде нешто што дотогаш не се слушаше гласно: возило што им пречи на итните служби треба да одговара исто како и човек што го прави тоа – со казни, па и затвор. Прашањето е кој оди в затвор кога зад воланот нема никого.