Семафор на тастер за дивиот премин кај Бит-пазар: седум месеци расправа, а никој не праша зошто натпатникот е затворен

По повеќе од седум месеци од најавата дека ќе го затвори, Град Скопје конечно донесе одлука за дивиот пешачки премин кај Бит-пазар: тој останува – но со обележан пешачки премин и семафор на тастер. Сообраќајното решение е веќе испратено до Министерството за внатрешни работи и Градот чека мислење.

За тие седум месеци, на таа иста локација се случија: еден неуспешен обид за поставување ограда, протест на чаирчани, откажување на Градот од оградата, и една сообраќајна несреќа со двајца повредени пешаци.

Значи, решението што сега се подготвува можело да биде подготвено и пред несреќата. Наместо тоа, локацијата остана иста – нелегален премин преку прометна улица – додека траеше расправата дали да се затвори или не.

Чекор назад или народна волја

Градоначалникот Орце Ѓорѓиевски одби одлуката да се нарече ретерирање.

„Не станува збор за политичко ретерирање тоа што кажав дека ќе се консултирам со граѓаните, бидејќи кај многумина од нив видов искрено барање на друг начин да го промениме и да го регулираме движењето на пешаците, имајќи предвид дека најголемиот број забелешки беа од повозрасни граѓани. Јас не се срамам и не се плашам некогаш ако треба некогаш да одам чекор назад кога е во прашање народната волја“, изјави тој.

Аргументот има реална основа, и тоа е делот што опозицијата не го спомена кога го обвини за политичко повлекување. Алтернативата на дивиот премин е натпатникот – кој со години е затворен и запуштен. Повозрасните граѓани физички не можат да го користат. Ако затвориш премин без да отвориш алтернатива, не си решил ништо – само си го преселил проблемот неколку метри настрана.

Работата што никој не ја спомна

Тука е дупката во целата приказна. Со месеци се расправаше дали преминот да се затвори или да се обележи, а прашањето зошто натпатникот е затворен и запуштен не доби ниту еден одговор.

Тоа е објект на кој некој е сопственик, некој е должен да го одржува и некој го затворил. Ако тој натпатник функционираше, дилемата за дивиот премин веројатно немаше ни да постои.

Ѓорѓиевски соопшти дека решението се изработува во договор со ЈП „Улици и патишта“ и СВР Скопје, врз основа на анализа и закон. Од Градот додаваат дека внимаваат новото решение да не создава дополнителен метеж.

Рок – нема

На прашањето кога граѓаните може да очекуваат семафор, од Градот не можеа да одговорат. Точниот рок, велат, ќе биде соопштен по завршувањето на сите процедури и откако ќе биде готово проектното решение.

Дотогаш, луѓето продолжуваат да го минуваат истиот премин на истиот начин на кој го минуваа и пред седум месеци – само сега со официјална потврда дека некој работи на тоа.