Давкова најавува средба со Јотова во Софија: нема нерешлив проблем, но условите остануваат

„Нема нерешлив проблем” – со тие зборови претседателката Гордана Сиљановска-Давкова ја најави средбата со бугарската потпретседателка Илијана Јотова, што ќе се одржи в среда во Софија, на маргините на самитот на Процесот за соработка во Југоисточна Европа. Реченица што звучи оптимистички, но зад која седи спор стар цела деценија.

Средбата доаѓа како продолжение на разговорите започнати во Ереван, а во поширок контекст – по предлогот на германскиот канцелар Мерц и францускиот претседател Макрон, искажан во Тиват. Идејата е дијалогот на највисоко ниво да отвори нова шанса за надминување на застојот меѓу Скопје и Софија.

Но позицијата на македонската страна останува јасна и условите се поставени. Премиерот Христијан Мицкоски, иако задоволен од разговорите со Мерц и Макрон, повтори дека нема уставни измени без гаранции против нови идентитетски и историски пречки во преговорите за ЕУ. И уште нешто: Бугарија мора да ги спроведе пресудите на стразбуршкиот суд за правата на македонските здруженија.

Сиљановска-Давкова нагласи дека односот кон одлуките од Стразбур мора да се промени, и дека разговорите треба да отворат суштински прашања, не само да бидат фотографирана учтивост. Дипломатскиот тон е добредојден – но Балканот добро знае дека срдечните средби и насмеаните фотографии не значат ништо ако зад нив не следат конкретни чекори. Дали оваа средба ќе биде различна, или само уште една во низата?