Еден од последните вистински гиганти на холивудската комедија наполни 100 години – и сè уште одбива да се пензионира. Мел Брукс, роден како Мелвин Камински во Бруклин во еврејско семејство со европски корени, остана активен во век кога повеќето негови современици одамна замолкнаа.

Животот не му беше лесен почеток. Татко му починал кога Мел имал само две години, а мајка му сама подигнала четири деца. На 17 години бил повикан во американската војска во Втората светска војна, а пред тоа веќе забавувал гости по њујоршките хотели. По војната почнал да пишува шеги за радио и за комичари, а раните педесетти го донеле во екипата на легендарната „Your Show of Shows”.

Потоа дојде серијата ремек-дела. Со „Get Smart” (1965) ја исмеа шпионската манија на тоа време. Режисерскиот деби „The Producers” (1967) му донесе Оскар за оригинално сценарио. А 1974 ги донесе двете класики со кои остана бесмртен – „Blazing Saddles” и „Young Frankenstein”. Брукс е и член на ретката група уметници со статус EGOT – освоени Еми, Греми, Оскар и Тони.

На приватен план, бракот со актерката Ен Банкрофт, кој траел од 1964 до нејзината смрт во 2005, останува една од најпознатите љубовни приказни на Холивуд. Син му Макс Брукс стана успешен писател. А самиот Мел не запира – во 2021 ги објави мемоарите, во јануари оваа година излезе документарната серија за неговиот живот, а продолжението на „Spaceballs” е најавено за 2027. На прашањето како се останува млад, одговорот му е едноставен: со љубопитство. Век подоцна, тоа звучи поубедливо од која било индустрија за подмладување.