Русија го погоди мостот кај Мајаки во Одеската област – патниот правец што ја врзува јужна Украина со Молдавија и Романија. Со тоа падна и последната сигурна врска до пристаништата во делтата на Дунав, а тие пристаништа не се детал. Тие се она што остана од украинскиот извоз.

Мостот е дел од магистралата М-15, која ја поврзува Одеса со Рени на Дунав и со границата кон Молдавија и Романија. Откако руските удари го парализираа сообраќајот по Црно Море, Рени и Измаил станаа главниот излез за украинската стока. Не алтернативен – главниот.

Редоследот кажува сè. Прво падна железничкиот мост во Затока, преку кој одеше најголемиот дел од помошта од Романија. Потоа целиот товар се слеа на еден единствен правец, М-15, со дел од трасата низ молдавска територија преку Паланка. Сега е погоден и патниот мост во Мајаки. Двата канала до дунавските пристаништа – затворени.

Кога останува само понтонот

Според извори, во нападот се употребени неколку ракети „Искандер”, а можно е мостот да е трајно изгубен. Никој не кажува кога ќе се врати сообраќајот. Руски воен дописник пријави километарски колони. Економистот Иван Лизан вели дека на Украина ѝ преостанува само една опција – понтонски мостови. Кои, поради тоа што се, не држат камиони како што треба.

Истата ноќ, според руското министерство за одбрана, во пристаништето Одеса се погодени складишта за гориво и мазива, воена опрема и претоварен комплекс. Уништени се и резервоари кај Белјари и Нови Белјари, 27 и 28 километри североисточно од пристаништето. Владимир Зеленски ја призна штетата на пристанишната и енергетската инфраструктура.

Следна станица: Констанца

Лизан не исклучува ескалација и очекува напади и врз самите дунавски пристаништа, со цел да се спречи претоварот во Констанца. Констанца е романско пристаниште. Романија е членка на НАТО и на ЕУ. Дали кога ракетите ќе почнат да паѓаат педесет километри од претовар што завршува во сојузничко пристаниште, некој во Брисел ќе го смета тоа за „далечен конфликт”?

Дунав тече и низ Србија, и низ Романија, и низ Бугарија. Балканот не гледа овој фронт од балкон. Реката што ја блокираат е истата река што со векови им е трговски пат на овие простори. Војна што почна како територијална веќе е логистичка – а логистиката нема граница на која застанува.