Србија преговара за иднината на својата најголема енергетска компанија – и нервозата е очигледна. Министерката за рударство и енергетика Дубравка Ѓеѓовиќ Ханданович се огласи по полноќ, веднаш по состанокот со претседателот на МОЛ групата Жолт Хернади, со една реченица што кажува повеќе од цел извештај: „Постојат црвени линии кои не можеме да ги преминеме.”

Какви црвени линии? Министерката посочи дека рафинеријата во Панчево мора да продолжи да работи со полн капацитет. Покрај тоа, побара МОЛ да ги преземе или замени обврските што НИС ги презеде во минатото, а кои се од значење за Република Србија. Кои обврски точно – не прецизираше.

Тема на разговорите била и идното управување со компанијата. Преговорите продолжуваат наредните денови во Белград, додека МОЛ паралелно преговара и со Газпромнефт и Газпром.

Значи: МОЛ, унгарскиот енергетски гигант, преговара за купување на НИС додека руските акционери сè уште се во играта, а западните санкции го комплицираат секој потег. Србија се обидува да го задржи контролниот пакет на стратешки ресурс, а притоа да не налути ниту Москва, ниту Будимпешта, ниту Брисел. Балканска енергетска акробатика во најчиста форма.