Деветнаесет дена Охрид ќе биде во знакот на водата. Четвртото издание на „Ohrid Water Festival” трае од 12 до 30 август, со над дваесет настани на езерото и четири вечери музичка програма.

Градоначалникот Кирил Пецаков и претседателот на фестивалот Никола Вретоски ја најавија програмата на прес-конференција. Петнаесет спортски клубови и здруженија организираат натпревари во едрење, кајак, ватерполо, нуркање, пливачки маратон, СУП, акватлон, спортски риболов и традиционална кајак регата.

Централниот настан останува Охридскиот пливачки маратон. На 29 август од 11 часот, во рамките на фестивалот, се одржува и Балканското првенство во маратонско пливање со трки на 2,5, 5 и 10 километри, во организација на ПК „Охридски бранови 2008″, а како место е наведено Малото пристаниште.

Музичкиот дел почнува на 26 август со концерт на Ѓоко Танески, следуваат учесниците на детскиот фестивал „Златно славејче”, групата „Везилка” и „Нокаут”. Ќе има и изложби посветени на езерото, водените спортови и флората и фауната на регионот.

Спорт наместо разгледница

Пецаков вели дека ова е правецот во кој се движи градот – природното и културното наследство да се спои со спортски туризам. Тоа не е празна фраза. Охрид со децении се продава како фотографија: црква, чамец, зајдисонце. Фотографијата не носи гости во втората половина на август, кога сезоната почнува да опаѓа. Натпревар во кој учествуваат клубови од повеќе европски земји носи, и тоа со ноќевања.

Вретоски вели дека бројот на учесници расте секоја година. Тоа е бројката што вреди да се следи следното лето – не колку настани има во програмата, туку колку луѓе навистина допатувале за нив. Дотогаш, Охридското Езеро деветнаесет дена ќе биде нешто повеќе од место за сликање.