Сто и шеесет барања за обесштетување стигнале до Општина Куманово по невремето од 20 јули. Толку кумановци и правни субјекти пресметале дека штетата им е доволно голема за да поднесат документ и да чекаат.

Најголемиот дел од пријавите се однесуваат на оштетени фасади, откорнати кровни конструкции на семејни куќи и станбени згради, оштетени покриви и возила погодени од паднати гранки и делови од кровови. Пријавени се и штети од поплавување со атмосферски води што навлегле во објекти од улиците и тротоарите, како и оштетени земјоделски насади.

Рокот за поднесување истече на 31 јули. Комисијата за проценка на штети досега одржала два состанока и ги разгледала сите пристигнати барања. По увидот на терен ќе изготви елаборат-извештај, кој ќе биде испратен до владината комисија за понатамошно постапување.

Тука доаѓа реченицата што вреди да се прочита двапати. Од Општината потсетуваат дека, согласно законската регулатива, сопствениците на објектите имаат обврска преку тековно и инвестициско одржување да ги обезбедат основните барања за безбедност и функционалност на градбите.

Преведено: ветерот ти го однесе кровот, но пред да добиеш денар, ќе се провери дали кровот бил доволно добро одржуван. Формално – точно. Практично – тоа е порака до 160 семејства дека процедурата има и излезна врата.

Од невремето до денес поминаа речиси три недели. Барањата се предадени, комисијата се состанала двапати, елаборатот сè уште не е готов, а потоа треба да патува до Влада. Колку време треба да помине пред некој што остана без покрив над главата да види пари? Никој од вклучените институции не кажува рок. Само дека постапката тече.