Шведскиот стартап Fika Jobs собра 4 милиони долари (околу 3,5 милиони евра) за платформа каде што за работа повеќе не ве интервјуира човек – туку вештачка интелигенција. Кандидатот го поврзува својот LinkedIn профил, поминува разговор од околу десет минути со ВИ-агент, а одговорите автоматски се сечат во кратки видео-клипови што работодавачите потоа ги прелистуваат како на општествена мрежа.

Парите ги предводи Luminar Ventures, со учество на Alliance VC и на основачите на познатата гејминг-компанија King. Зад Fika стојат браќата Јакоб и Александар Дубоа од Стокхолм. „Кога го градевме претходниот проект, минувавме многу време во вработување и за малку ќе пропуштевме кандидат само затоа што неговото CV не блескаше”, вели Јакоб Дубоа, извршен директор на компанијата. Системот, кој работи на Google Gemini, прегледува биографија и генерира прашања специјално за секој кандидат.

Бизнис-моделот е тоа што ќе им се допадне на работодавачите: бесплатно за оние што бараат работа, а компаниите плаќаат 10 проценти од првата годишна плата на вработениот – наспроти вообичаените 20 до 30 проценти што ги наплаќаат класичните агенции за вработување. Поевтино, побрзо, поскалабилно.

И тука е местото каде вреди да се застане. Идејата дека алгоритам ќе процени дали некој е добар за работа врз основа на десетминутно видео звучи ефикасно сè додека не се најдете од другата страна на камерата. Што се случува со кандидатот што се снаоѓа подобро во разговор лице в лице отколку пред објектив? Кој одговара кога моделот ќе те отфрли по критериуми што никој не ти ги кажал? Автоматизацијата на вработувањето ветува правичност преку машина, но машината учи од истите луѓе чии предрасуди наводно требало да ги отстрани.