Лани литар млеко се откупуваше и по 33 денари. Денес е 23. Сточарите предупредуваат дека, ако продолжи вака, ќе падне на 20 денари – колку шише вода во маркет. А премијата за млекото што требаше да го ублажи падот не е исплатена од јули 2025 година.

Затоа сточарите и земјоделците од Пелагонија излегуваат на улица. Протестот е во среда, 30 септември, од 11 часот кај Тополчани, покрај млинот „Осман“ на патот Битола-Прилеп, и ќе трае околу час и половина. Го организираат здруженијата „Пелагониско поле“ и „Фармери Југозапад“.

„Досега требаше да бидеме исплатени и за првиот квартал од 2026 година. Но, сè уште немаме пари за десет месеци“, вели Борче Бучински од „Пелагониско поле“. Според познавачи на секторот, државата на сточарите им должи околу 600 милиони денари премии за млеко за 2025 година и уште околу 500 милиони за првите месеци од 2026.

Министерот за земјоделство Борче Серафимовски раскажува друга приказна: од 7,295 милијарди денари предвидени за поддршка на земјоделството годинава, исплатени се околу 6,512 милијарди, или околу 90 проценти. Бучински одговара директно: „Го демантираме министерот Серафимовски… Ние велиме дека нема исплата ни на 50 проценти од обврските кон земјоделците“.

Двете бројки можат да бидат точни истовремено – и токму тоа е проблемот. Процентот на министерот е просек, а сточарот не живее од просек. Последната исплата на премијата за млеко беше во март, кога 4.545 производители добија 270 милиони денари – но за периодот јануари-јуни 2025. Субвенциите по грло за 2025 се платени во август, по 8.000 денари, иако, според сточарите, пред две години беа 12.000.

Барањата се јасни: навремена исплата, учество во изработката на Програмата за 2027 година и 250 евра поддршка по крава. Миле Кебакоски од „Фармери Југозапад“ вели дека се обиделе проблемите да ги решат на маса во Министерството, но не успеале да добијат ни состанок. „Жал ми е што мораме да протестираме за нашите проблеми“, вели тој.

Министерот најавува сателитски снимки и засилени контроли против „ловците на субвенции“. Добро. Но кога човекот што секое утро молзе крави чека десет месеци за својата премија, кој тука кого лови?