„Во ЦЕРН за дел од секундата создадоа злато од олово“

Во истражувачкиот центар ЦЕРН во Швајцарија, научниците успеаја да постигнат нешто што со векови беше само мит во алхемијата – трансформација на олово во злато.
Во експеримент спроведен во рамки на ALICE-детекторот во Големиот хадронски судирач (LHC), за дел од секундата беше создадено вистинско злато од олово.

Процесот не беше магија, туку чиста нуклеарна физика. При судир на атомски јадра на олово со огромна енергија, дел од протоните и неутроните беа изместени. Со одземање на три протони од оловото (кој има 82 протони), се создаде атом со 79 протони — токму колку што има златото.

Резултатот траеше само миг. Создаденото злато постоеше дел од секунда пред да се распадне, но за науката тоа беше доволно: алхемискиот сон на човештвото е теоретски и практично возможен.

Научниците објаснуваат дека, иако процесот бара неверојатни услови — енергија, температура и притисок какви што се среќаваат само во ѕвезди или при судари во LHC — експериментот покажува дека златото може да се добие од други елементи, но не и економски оправдано.

„Ова не е пат кон богатство, туку кон разбирање на границите на материјата“, изјавија од ЦЕРН.