Подната фонтана на плоштадот „Македонија” се разглобува. Бетонските плочи се извадени и наредени околу самата конструкција, а на плоштадот работи багер – слика што повеќе потсетува на градилиште отколку на најпосетуваната точка во Скопје.

Градоначалникот на Скопје, Орце Ѓорѓиевски, соопшти дека се работи за темелна и трајна реконструкција. Опремата е специјализирана, произведена во Германија, а автоматизацијата бара прецизно усогласување и целосно враќање на функционалноста.

Најинтересниот детал е она што стоело под плочите досега. Постојната носечка потконструкција била изработена од пластични носачи, кои поддржувале бетонски плочи со тежина од околу 100 килограми по елемент. Пластика под сто килограми бетон, на плоштад по кој секој ден одат десетици илјади луѓе.

Сега тие носачи се заменуваат со нова конструкција од иноксни профили, проектирана да издржи значително поголеми механички оптоварувања. Ќе бидат заменети и оштетените плочки на потегот од Порта „Македонија”.

Ѓорѓиевски отворено рече дека фонтаната „поради долгогодишна негрижа беше оставена да пропаѓа”. Тоа е признание што вреди да се задржи во сеќавање.

Подната фонтана е изградена како дел од проектот „Скопје 2014″ и е пуштена во употреба во 2015 година. Низ годините беше оштетувана повеќепати, откако во неа пропаѓаа камиони и други тешки возила – што и не изненадува кога ќе се знае што ја држело одоздола.

Значи: за деценија една фонтана на главниот плоштад пропадна, се крши под тежината на возила, и сега бара целосна реконструкција со увезена опрема. Прашањето не е дали е добро што сега се поправа – добро е. Прашањето е кој ја проектираше со пластични носачи, кој ја прими работата и колку чинеше тогаш.

Фонтаната, ветува градоначалникот, повторно ќе биде место за средби, детска игра, фотографии и прошетки. Веројатно ќе биде. Прашањето е колку долго – и дали некој ќе биде повикан на одговорност ако за уште десет години приказната се повтори.