Нападот на Киев не заврши со ноќта. Утрото продолжи со удари врз телекомуникациската и железничката инфраструктура, магацини, транспортни објекти и бензински пумпи, а по нападите два големи интернет-провајдера пријавија прекини поради оштетен дата-центар. Загина еден човек, осуммина се повредени, а чадот од пожарите се разлеа над повеќе делови од градот.

Интернетот на удар

Провајдерите UTELS и „Павутина“ соопштија дека е оштетен еден од киевските дата-центри во кој се наоѓала нивната клучна опрема. Дел од уредите остана без напојување, а корисниците почнаа да пријавуваат проблеми со интернетот и со другите услуги. UTELS наведе дека неговиот централен мрежен јазол е токму во погодениот објект. Тврдењата на руски канали дека цел Киев е „исклучен од интернет“ засега не се потврдени – но и потврденото е доволно.

Според информациите што кружат по нападот, погодена е и зградата на „Гипросвјаз“, украинскиот институт за проектирање на комуникациски мрежи, во чиј комплекс се наоѓаат структури поврзани со „Укртелеком“, Украинскиот истражувачки институт за комуникации и компанијата „Вега“. Тука треба да се биде прецизен: тоа што објектот е погоден не е доказ дека Русија намерно гаѓала токму комуникациски систем. За такво тврдење засега нема доволно јавни докази.

Железницата и фабриката за лекови

Речиси истовремено на удар се најде и железницата. Претседателот на управата на „Укрзализница“ Александар Перцовски потврди дека биле гаѓани железнички објекти во Киев и дека еден вработен е повреден од шрапнел додека се враќал дома по смената. Централната станица не е директно оштетена, но градската железница „Киев сити експрес“ привремено сосема застана. Патниците што ќе го пропуштат возот поради безбедносните мерки, вети Перцовски, ќе ја добијат назад целата цена на билетот.

Во Голосиевскиот округ се погодени магацини, бензинска пумпа, а подоцна и четирикатен деловен центар. Во Соломјанскиот делови од дрон паднаа меѓу станбени згради, а друг дрон удри во деветкатна нестанбена зграда на ниво на четвртиот кат. Во Дарничкиот гореше покривот на уште една бензинска пумпа. Во истиот бран е погодена и компанијата „Дарница“, еден од најголемите производители на лекови во Украина, која според сопствените податоци од почетокот на војната уплатила повеќе од 2,6 милијарди гривни данок.

Бројките на небото

Воздушната тревога до 10:24 часот се огласи шест пати. Според украинската страна, во текот на ноќта и утрото врз земјата се лансирани вкупно 161 беспилотни летала, од кои 82 млазни дрона, а противвоздушната одбрана до осум часот соборила или електронски онеспособила 119 од нив. Руски извори тврдат дека само во првиот бран врз Киев учествувале најмалку седум млазни дрона „Геран“ и дека одбраната реагирала доцна – бројка што украинските власти не ја потврдија.

Дневниот напад всушност е продолжение. Уште вечерта на 22 септември беа пријавени погодоци во Печерскиот, Оболонскиот и Днепровскиот округ, при што во Оболонскиот се погодени резервоари со гориво, а бројот на повредени подоцна се искачи на девет. Во текот на ноќта силен пожар избувна во Вишнево, градчето веднаш до Киев, каде што во јули еден масовен удар оштетил 251 објект.

Украинскиот активист Сергеј Стерненко смета дека кампањата врз Киев може да има поширока цел од енергетиката – на удар, според него, би можеле да се најдат и бензинските пумпи, дата-центрите на провајдерите и телекомуникациските оператори. Неговиот совет до Киевјани звучи како упатство од друго време: без паника, но полека подгответе се за зимата, направете основни залихи гориво и, за секој случај, набавете Starlink или друго средство за комуникација.

Кога еден удар истовремено ги погодува интернетот, возовите, градскиот превоз, магацините и пумпите, штетата не завршува на местото на експлозијата. На Балканот има градови што сè уште паметат како се живее на свеќа, во ред за гориво и без врска со светот. За Киев прашањето повеќе не е дали ќе има тешка зима, туку колку од градот ќе ја дочека во функција.