Еколошкиот план на Битола две години чекал на прв состанок: Коњановски го слави почетокот, а што е направено не се кажува

Општина Битола оваа недела се пофали со „прва седница“. Координативното тело што треба да го следи спроведувањето на Локалниот еколошки акционен план (ЛЕАП) конечно седна на маса. Детал што соопштението не го нагласи: планот е донесен во 2024 година.

Хронологијата е едноставна, ако се читаат датумите наместо пофалбите. ЛЕАП за периодот 2024-2030 е усвоен пред две години. Телото што треба да го следи е формирано со одлука на Советот дури на 7 јули годинава. Првата седница се одржа на 7 октомври. Две години од планот до првиот состанок на оние што треба да проверуваат дали планот се спроведува.

Градоначалникот Тони Коњановски на седницата порача дека заедничката задача е „ЛЕАП да го претвориме од стратешки документ во конкретни резултати“ и дека донесувањето на планот е само „почетна основа“. Точно. Само што таа основа стоеше две години без телото што требаше да ја следи.

Што се работело – не се кажува

Телото има 11 членови: градоначалникот, луѓе од администрацијата, советници, директори на јавни претпријатија и претставници на граѓански здруженија. На седницата им бил презентиран „досегашниот степен на реализација“ на мерките. Колкав е тој степен, јавноста не дозна. Во објавата на Општината нема информација што е направено, колку пари се потрошени и кои организации биле партнери.

А темите не се апстрактни. ЛЕАП ги опфаќа управувањето со отпадот, дивите депонии, квалитетот на воздухот и заштитата на природата – работи што секој Битолчанец ги чувствува на улица, а не во стратешки документи. Ако по две години единствената вест е дека телото се состанало, кога ќе ја слушнеме вестта дека нешто е исчистено?