Автокоманда чекор поблиску до зонско паркирање: три милиони денари за знаци, а за цената и правилата за жителите – ни збор

Во Автокоманда паркирањето толку излегло од контрола што жители на една зграда сами поставија рампа на паркингот пред неа. Сега и институциите направија чекор: Советот на Општина Гази Баба донесе одлука за меѓуопштинска соработка со Град Скопје за сообраќајна сигнализација и направи за смирување на сообраќајот во населбата, откако оваа меѓуопштинска соработка претходно ја изгласа и Советот на Градот.

Градоначалникот Бобан Стефковски вели дека со одлуката „се приближуваме до воведувањето зонско паркирање во населбата“. Зафатот ќе чини околу три милиони денари и целосно ќе го финансира Град Скопје. Знаците и боењето на улиците ќе ги работи ЈП „Улици и патишта“, а Општината ќе даде ревидиран Основен сообраќаен проект за измена на режимот на сообраќајот.

Од Општината зборуваат за „порационално користење на расположливите паркинг-места“ и „поуреден јавен простор“. Сѐ убаво. Но ниту во една објава нема датум кога почнува наплатата, колку ќе чини часот, какво ќе биде работното време, ниту – што е најважно за луѓето што живеат таму – под кои услови жителите ќе паркираат пред сопствената зграда.

Зонското паркирање може да ја реши лудницата во Автокоманда. Може и само да ја наплати. Разликата ќе ја направат токму тие детали што засега никој не ги кажува, а жителите со право ќе ги бараат пред првата казна, не по неа.