Членови на озлогласената меѓународна криминална мрежа „Пинк Пантер“ стојат зад вооружениот грабеж на златарница во хотелски комплекс на Халкидики, Грција, што се случи во септември минатата година, а при кој бил украден накит и луксузни часовници во вредност од речиси 580.000 евра, објавуваат грчките медиуми, повикувајќи се на истрага на полицијата и Европол.

Според информациите, станува збор за добро организирана криминална група која делува во рамките на балканските меѓународни криминални мрежи, познати по името „Пинк Пантер“. Оваа група со години е позната по дрски, брзи и прецизно испланирани грабежи на златарници и луксузни бутици низ Европа, при што главна цел им се скапи часовници и накит со висока вредност.

Брза и прецизна акција

Вооружениот грабеж се случил на 2 септември, околу пладне, кога двајца од сторителите влегле во златарницата и под закана со пиштол ги држеле вработените, додека за само неколку минути го собрале целиот вреден плен. Веднаш по грабежот, тие исчезнале од местото на настанот, што, според полицијата, укажува на исклучително внимателно испланирана акција – како при пристапот, така и при бегството.

Истовремено, уште двајца членови на групата имале споредна, но клучна улога. Тие се преправале дека се обични муштерии и ја набљудувале околината, следејќи ја реакцијата на луѓето и евентуалното присуство на полиција.

Детална подготовка и прикривање на трагите

Истрагата покажала дека четворица членови на криминалната група престојувале во Грција од 20 август до 2 септември 2025 година, исклучиво со цел да го реализираат грабежот. Тие влегувале во земјата во различни периоди, користеле фалсификувани патни исправи и изнајмувале возила со украдени регистарски таблички за да го отежнат нивното откривање.

Пред грабежот, групата спровела повеќекратни извидувања на локацијата, внимателно ги анализирала движењата на вработените и безбедносните услови, а за пристигнување и бегство користеле комбинација од автомобили и електрични тротинети – метод кој им овозможил брзо напуштање на местото без да привлечат внимание.

Познати по серија европски грабежи

Еден од главните осомничени, 48-годишен маж, веќе бил познат на швајцарските власти по вмешаност во кражби и грабежи, додека грчката полиција истражува дали другите осомничени биле поврзани со слични вооружени грабежи во други европски земји во текот на 2024 и 2025 година.

Според безбедносни извори, „Пинк Пантер“ е една од најпознатите и најопасните криминални мрежи на европско тло, со членови од Балканот, кои со години успеваат да избегнат апсење благодарение на својата мобилност, дисциплина и брза промена на методите на работа.

По апсењето на осомничените, надлежните судски органи треба да донесат одлука за нивна екстрадиција во Грција, каде што ќе се соочат со обвиненија за вооружен грабеж, учество во криминална организација и незаконско поседување оружје.

Грчките власти, во соработка со Европол и странски полициски служби, продолжуваат со истрагата за да утврдат дали истата група стои зад уште неколку нерешени грабежи во регионот.