Експлозивот за аеродромот во Лајпциг поминал низ Бугарија и Србија: откриен Русинот зад досега најголемата руска саботажа во Европа

Речиси два килограма пластичен експлозив Семтекс, скриени во камиони, поминале низ Бугарија и Србија пред да стигнат во Германија. Таму требало да завршат во лименка закачена на дрон, насочен кон украински товарен авион на аеродромот Лајпциг-Хале. Заедничка истрага на британски и германски новинари сега тврди дека го знае и човекот што го смислил целиот план: Русинот Олег Левушкин, мотоциклист со директна врска до самиот врв на руската мрежа за саботажи во Европа.

Целта бил паркиран Антонов Ан-124 со околу 25.000 литри керозин во резервоарите. Дронот стигнал до целта – лименката со експлозив удрила во крилото на авионот – но направата не експлодирала и паднала на пистата. Да експлодираше, огромен пожар ќе го зафатеше еден од најважните логистички центри за воената помош на Украина. Катастрофата ја спречи чиста среќа, а не некоја служба.

Семеен човек со втор живот

Според истражителите, Левушкин го разработил планот, а потоа ангажирал белорускиот оперативец Андреј Каршакоу, таканаречен „потрошен агент“, да го изведе самиот напад. На местото полицијата пронашла остатоци од три дрона и импровизирана антена за наведување залепена на блиското дрво. ДНК од парче ракавица покрај антената директно се совпаднала со Каршакоу, кого полицијата во Финска и Литванија го познава од порано. Тој веќе се поврзува со подметнат пожар во продавница за градежен материјал во полскиот град Лоѓ во 2024 година.

Во јавноста, Левушкин со години се претставувал како мирен семеен човек што со сопругата и ќерките ужива во скијање, риболов и долги тури со мотор низ Европа. Зад фасадата, според истрагата, стоел постојан контакт со Денис Смољанинов, висок офицер што го води украинскиот оддел во руската воена разузнавачка служба ГРУ и кого западните служби го сметаат за главен планер на бомбашките напади низ Европа. Смољанинов ги врбува соработниците преку апликацијата Telegram.

Берлин знаел, но не следел

Најнепријатниот детал не е за Москва, туку за Берлин. Германските безбедносни служби знаеле дека Левушкин е поврзан со ГРУ уште кога влегол во земјата преку Турција, но откако пристигнал, не го ставиле под оперативен надзор. Податоците од автомобилот што го изнајмил на берлинскиот аеродром подоцна покажале дека обиколил неколку локации со скриено оружје, а пет дена пред нападот лично го посетил аеродромот во Лајпциг и ги снимал терминалите.

Западните служби операциите ѝ ги припишуваат на озлогласената единица 29155 на ГРУ и на придружната единица 52659 – одделенија за ликвидации, подметнување пожари и диверзии, кои стојат и зад пакетите-бомби што предизвикале пожари во магацините на DHL во Бирмингем и Лајпциг. Идентични лименки со Семтекс претходно биле ископани на гробишта во Литванија, од каде требало да бидат префрлени кон цели во Полска и Германија.

„Германија сè повеќе станува оперативно бојно поле за руските служби. Тоа што порано беа изолирани случаи, сега го гледаме во големи размери“, предупредил висок германски разузнавачки функционер. Руската амбасада во Берлин ги отфрли сите обвинувања како нов бран „антируска хистерија“ и порача дека европските елити измислуваат непостоечка закана за да ги оправдаат огромните воени буџети пред сопствените граѓани.

За регионот, најважната реченица во целата истрага е онаа за маршрутата. Експлозивот за Лајпциг патувал со камиони преку Бугарија и Србија – по патиштата по кои секој ден кон Западна Европа минуваат колони товарни возила. Ако речиси два килограма Семтекс стигнале низ Балканот до Германија, што уште патува по истиот пат? И дали службите во Софија и Белград ќе објаснат како се случило тоа?