Општина Битола го зголеми бројот на сектори од шест на десет, а бројот на одделенија од 19 на 27. Од локалната власт тоа го нарекуваат дисперзија на моќ и усогласување со новите закони. Опозицијата тоа го нарекува вработување на партиски кадри и потсетува на стар виц – „заменик на заменикот, заменик-директорот на директорот“.

Одлуката за организацијата, делокругот и начинот на извршување на задачите на општинската администрација ја изгласа советничкото мнозинство предводено од ВМРО-ДПМНЕ, на предлог на градоначалникот Тони Коњановски. Со неа се става крај на систем што важел од 2015 година.

Математиката е она што ја носи расправата. Десет сектори и 27 одделенија значат дека општината мора да назначи најмалку 37 раководни лица. Советникот Миле Трајковски од граѓанската иницијатива „Поинаку“ пресметува дека според сегашната систематизација имало околу 20 раководни позиции, а со новата бројот се качува на 38. Од опозицијата тврдат дека тоа ќе ја оптовари администрацијата со повеќе од 200.000 евра годишно.

„Дали навистина постои реална потреба од нова, толку бројна администрација или повторно сме сведоци на партиско и политичко наградување на послушниците?“, праша Трајковски.

Одговорот од другата страна

Претседателот на Советот Бојан Бојкоски образложи дека општинската администрација брои 143 вработени и е најмала согласно бројот на жители. Додаде дека со двата нови закони – за административни службеници и за вработени во јавниот сектор – реорганизацијата мора да се направи најдоцна до 1 јануари 2027 година.

„Единствено се прави дисперзија. Оние функции коишто ги имале дел од одредени раководители на сектори и одделенија, сега се споделуваат со останатите вработени за да нема концентрација на моќ кај едно лице“, рече Бојкоски.

Аргументот не е глупав. Од општината посочуваат дека гломазните сектори значат акумулација на надлежности кај еден човек, што е товар што тешко се извршува квалитетно. Со 143 вработени и 38 раководни позиции, сепак, речиси секој четврти вработен во Општина Битола ќе биде нечиј раководител.

Она што е добро во одлуката

Не е сè за критика. Со новата шема се формира посебно ИТ одделение за дигитализација и се најавуваат електронски услуги и дигитализиран Географски информациски систем, преку кој граѓаните ќе можат да вадат документи и да имаат увид во урбанистичките планови од компјутер. Ако тоа профункционира, шетањето по шалтери во Битола навистина ќе се намали.

Проблематична е друга ставка. Во одлуката експлицитно стои дека Секторот за внатрешна ревизија одговара „директно и единствено на градоначалникот“. Ревизор што одговара само на човекот чијашто администрација ја ревидира е ревизор со ограничена храброст. Ако најде нерегуларност кај соработник на првиот човек на градот, извештајот тргнува кај – првиот човек на градот.

Одделението за човечки ресурси, пак, добива задача да спроведува постапки за „мобилност“ на вработените. Во законот тоа значи брза реорганизација на кадри. Во македонскиот јавен сектор истиот термин со години служи како начин да се преземат службеници од други институции и да се заобиколат редовните јавни огласи.

Одлуката е изгласана, но не може да профункционира без согласност од Министерството за јавна администрација. Дотогаш останува отвореното прашање: дали Битола добива побрза општина или само поскапа.