Два трансформатора, секој со тежина од над триесет тони, лежат превртени на земја. Маслото истурено. Бакарните намотки исчезнати. Штетата, по првична проценка, е околу пет милиони евра. Ова не е слика од воена зона, ова е електровлечната потстаница Драчево, помеѓу железничките станици Лисиче и Драчево, во Скопје.

Од Македонски железници Инфраструктура соопштија дека од објектот се украдени бакарни жици, бакарни шини и прачки, како и практично сите уреди и елементи потребни за да работи потстаницата. Објектот сега е целосно нефункционален. Кражбата, како што покажуваат наодите, се одвивала во период од околу шест месеци. Пријавата стигнала на 25 јули во 14:25 часот.

Шест месеци во кои никој ништо не видел

Тука е делот што бара внимание. За да превртиш трансформатор од триесет тони, потребна ти е механизација. Не отворач за конзерви, не влечење со раце – тежок кран или багер. Тоа значи возила што влегуваат и излегуваат, мотори што работат, метал што се сече. Во период од половина година. Во Драчево, кое не е пуста планина, туку населба во Скопје.

Од Министерството за транспорт и врски ова го нарекоа „сериозен напад врз критичната железничка инфраструктура и врз имотот на државата и граѓаните”, а не обична кражба на бакар. Формулацијата е точна. Проблемот е што таа формулација доаѓа после, а не пред пет милиони евра штета.

Кој ја чувал потстаницата?

Електровлечната потстаница е дел од инфраструктура од која зависи безбедноста на железничкиот сообраќај. Такви објекти имаат режим на чување, надзор, периодични прегледи. Ако објект од таа категорија може да биде разграден до последна шајка во тек на шест месеци, тогаш не е прашањето само кој го крадел, туку кој бил платен да го чува и што работел во тие шест месеци.

Досега нема информација за приведени лица. Има траги, велат од полицијата, и наводно грешки направени од сторителите при кражбата. Пет милиони евра се приближно колку што чини цел мал инфраструктурен проект во оваа држава – а тука се изгубени од објект што бил во сопственост на државата и требало да биде под клуч.