Шест удари врз два моста за само неколку дена. Толку пати, според украинскиот министер за надворешни работи Андриј Сибиха, руските сили ги погодиле мостовите преку Днепар во Киев, град што реката буквално го дели на два дела. Сибиха побара од западните сојузници „одлучна акција“ и предупреди дека мостовите не се само сообраќајници.

„Мостовите се витални артерии што овозможуваат земјата да функционира, ги поврзуваат заедниците и им овозможуваат на луѓето да одат на работа и да добијат основни услуги“, изјави тој. Според него, ударите биле изведувани и во моменти кога преку мостовите минувале автомобили и возови на метрото.

Јужниот и Северниот мост, ден по ден

Нападите почнаа на 1 октомври. Прво повеќепати беше погоден Јужниот мост, преку кој минуваат и патниот сообраќај и линијата на метрото. За време на првиот удар по него се движеле автомобили, а на мостот се наоѓал и воз на метрото. По повторниот напад мостот е целосно затворен. Во следните денови на ред дојде и Северниот мост, каде што се оштетени коловозот и контактната мрежа на јавниот превоз, а при нападите има и повредени. Сообраќајот меѓу левиот и десниот брег на Киев неколку пати практично бил парализиран.

Москва ги потврди нападите врз Северниот мост, но тврди дека не го гаѓала поради цивилниот сообраќај, туку затоа што преку него се префрлале украински единици и воен товар. Руското Министерство за одбрана веќе најави засилување на ударите врз воени, воено-индустриски и поврзани инфраструктурни објекти низ цела Украина, откако Володимир Зеленски најави дека Киев ќе ги засили нападите врз руските рафинерии.

Логиката на ударите е сурова и едноставна: мостот не мора да се урне. Доволно е да се оштети коловозот, инсталациите или конструкцијата, па прелазот да остане затворен додека стручњаците не проценат дали е безбеден. Град од неколку милиони луѓе е преполовен, а мостот не мора ни да падне.

Млазните „Герани“ и услугата од Пјонгјанг

Ударите се тешки за одбрана поради новите млазни верзии на дроновите „Геран“. Постарите модели со клипни мотори летаа со околу 180 километри на час и можеа долго да се следат по звукот и по правецот. Новите достигнуваат приближно 500 до 600 километри на час. Мобилните групи со тешки митралези, кои со години беа главното средство против бавните дронови, сега многу потешко ја фаќаат целта, па Украина сѐ почесто мора да троши поскапи противвоздушни ракети или борбени авиони.

Токму таа технологија, според Зеленски, Москва ја споделила со Северна Кореја. На прашање дали верува дека Русија му ја дала на Пјонгјанг технологијата зад новите млазни беспилотни летала, одговори без двоумење: „Да, секако. Тие ги делат сите технологии со Северна Кореја. Не знам точно за балистичките и другите системи, но мислам дека и тоа го делат, затоа што Северна Кореја им помогна со ракети.“ Тврдењето засега не е независно потврдено.

Пјонгјанг на Москва ѝ испорача милиони артилериски гранати, балистички ракети и војници. Според украинските проценки, над 8.000 северокорејски војници веќе се во Русија, а уште околу 10.000 се подготвуваат за можно распоредување. Јужна Кореја со години предупредува дека Ким Џонг Ун не праќа војска и муниција без сериозна противуслуга. Зеленски сега тврди дека услугата почнала да се враќа.

Сибиха бара западниот одговор да не остане само на осуди, туку да донесе дополнителна противвоздушна одбрана, нови санкции против рускиот воено-индустриски комплекс и мерки против луѓето и компаниите што, според Киев, ги овозможуваат ударите. „Светот не може само да стои и да чека“, рече тој. Балканот добро знае колку чини кога светот токму тоа го прави. Прашањето е дали овојпат одговорот ќе стигне пред следниот удар.