Хрватски Рафал пресретна патнички Боинг што емитувал код за киднапирање: НАТО ја крена тревогата, Нирнберг го затвори аеродромот

Четири цифри на транспондерот – 7500 – и во воздухот полета борбен авион. Хрватски „Рафал“ пресретна малтешки патнички Боинг што летал од Грција кон Германија, откако неговиот транспондер го емитувал меѓународниот код за киднапирање на авион. Пресретнувањето го нареди НАТО, а го соопшти хрватското Министерство за одбрана.

Хрватскиот пилот го пресретнал Боингот во 11:02 над Кореница, визуелно го идентификувал и воспоставил радио врска со екипажот. Потоа го придружувал низ просторот меѓу Риека и Делнице, сè до 11:20, кога патничкиот авион влетал во словенечкиот воздушен простор.

Што значи кодот 7500

Транспондерот е уредот со кој авионот испраќа податоци за радарска идентификација. Кодот 7500 е меѓународно договорен сигнал со кој екипажот ја предупредува контролата на летање дека авионот е киднапиран или дека некој незаконски ја презел контролата. Безбедносните служби го третираат како сериозна закана – затоа полетуваат борбени авиони. Информацијата до командниот систем на НАТО стигнала од Италија, а наредбата за полетување ја издала Здружената воздухопловна команда во шпанскиот Торехон.

Хрватското министерство не потврди дека авионот навистина бил киднапиран, туку само дека поради кодот бил означен како можна закана. Ниту бројот на летот ниту причината за активирањето на кодот не беа објавени.

Нирнберг го затвори аеродромот

Рутата, времето и околностите одговараат на Боинг 737-800 на компанијата „Corendon Airlines Europe“, кој на летот XR456 летал од Крф кон Нирнберг. Авионот безбедно слетал околу 12:16, придружуван и од германски борбени авиони „Еурофајтер“. Аеродромот во Нирнберг привремено го запре целиот сообраќај, неколку авиони беа пренасочени кон Франкфурт, Меминген, Штутгарт и Минхен, а според неофицијални информации на аеродромот биле испратени и специјални полициски единици.

Германската полиција потврди дека пилотот по активирањето на кодот не можел да се добие преку радио. Една од можностите што ги проверуваат истражителите е дефект на радиоопремата во пилотската кабина. По слетувањето авионот е прегледан и полицијата објави дека нема опасност. Аеродромот во Нирнберг и претходната ноќ имал проблеми – тројца пилоти независно пријавиле непознат објект, најверојатно дрон, кој не бил пронајден.

Хрватска од 1 јануари 2026 година самостојно го чува своето небо со „Рафалите“, во рамките на интегрираниот систем за противвоздушна одбрана на НАТО. Во Загреб пресретнувањето го претставија како доказ за брзината на нивните пилоти. Добро. А кој би полетал ако код 7500 светне над Македонија?