Буњуели де виенто, шупливите топчиња за Денот на сите светци: 180 грама брашно, четири јајца и половина час одмор за тестото

Според легендата, околу 1090 година гратчето Алмохија кај Малага било под опсада, гладот стегал, а дворскиот готвач смислил оружје од тесто: топчиња пржени во казани со врело масло на ѕидините, за да се фрлаат врз непријателот. Дали било така, никој не знае. Сигурно е дека она што во легендата е муниција, денес на Денот на сите светци се реди на тацна и се полни со крем.

Буњуелите де виенто имаат и постара историја од легендата. Првите спомени се од Рим во втори век, во рецепт наречен „глобуси“ поради изгледот. Рецептот го наследиле Сефардите и Арапите, а Арапите го пренеле на Пиринејскиот Полуостров. Во средниот век калуѓерките ги правеле и ги продавале за Денот на сите светци. Се вели дека претставуваат души што се издигнуваат од чистилиштето и дека со секое изедено топче се ослободува по една душа. Кој на Задушница носел жито на гробишта, нема да се чуди што и овде храната и покојните седат на иста маса.

„Виенто“ на шпански значи ветер, и тоа е цела тајна: тестото се надува во маслото и останува шупливо и лесно. Затоа може да се јадат празни или да се полнат со слаткарски крем, шлаг или чоколада.

Состојки: 180 грама брашно за колачи, 4 јајца, 5 грама прашок за печење, 250 грама вода или млеко, 50 грама путер, 4 лажици шеќер (една за тестото, останатите за посипување), малку сол и масло за пржење, благо маслиново или сончогледово.

Подготовка: Во тенџере стави ги водата, путерот, една лажица шеќер и солта и почекај да зоврие. Додај го просеаното брашно со прашокот и мешај со дрвена лажица додека тестото не почне да се одвојува од ѕидовите. Тргни го од оган и остави го неколку минути да се излади. Додавај ги јајцата едно по едно, мешајќи по секое, додека не добиеш пенлив крем. Тестото нека одмори околу 30 минути.

Во голем длабок тиган загреј многу масло. Спуштај лажичиња тесто во добро загреаното масло и пржи додека не се надујат и не порумени. Извади ги на кујнска хартија, остави ги малку да се изладат, па наполни ги или посипи ги со преостанатиот шеќер. Не ги прескокнувај ладењето пред јајцата и одморот пред пржењето.