Në Shelekhov, një qytet i vogël në rajonin e Irkutskut në Siberi, vdiq një teknike e re laboratori nga Instituti i Irkutskut për luftën kundër murtajës. Darya Shipilova ishte shtruar në spital me pneumoni të rëndë dhe ishte lidhur me respirator, ndërsa disa ditë më vonë vdiq. Që atëherë Rusia zyrtare po zbaton taktikën e saj të preferuar: sa më pak fjalë.

Guvernatori i rajonit Igor Kobzev refuzon ta emërtojë sëmundjen - për të kjo është „një sëmundje ngjitëse e rrezikshme“. Të gjitha ngjarjet publike në rajon janë anuluar. Udhëheqësja e shërbimit sanitar rus Anna Popova udhëtoi personalisht nga Moska, rreth 4.200 kilometra larg. Mjekët dhe personeli mjekësor flasin hapur mes vete për murtajë, por në dokumentet zyrtare mjekësore ajo diagnozë nuk përmendet askund.

Epruvetë e thyer apo ekspeditë?

Sipas njërit version, Shipilova më 25 shtator theu një epruvetë me mostër të gjallë të bakterit. Sipas tjetrit, simptomat u shfaqën pas kthimit nga një ekspeditë në terren në Buriati, afër kufirit me Mongolinë, ku ekziston një vatër natyrore e sëmundjes. Epidemiologu i njohur rus Mikhail Favorov e hedh poshtë historinë me epruvetën: „Kjo është qesharake. Dikush që punon në Institutin për luftën kundër murtajës në Irkutsk mban kostum mbrojtës. Nëse thyen një epruvetë, gjasat për infektim janë shumë të vogla.“ Dhe shton: „Kjo është absolutisht e frikshme. Nuk do të na thonë çfarë ndodhi në të vërtetë.“

Spitale të mbyllura dhe shoqërim i armatosur

Edhe pse autoritetet rajonale e qetësonin publikun, shifrat thonë diçka tjetër. Zyrtarisht janë identifikuar 197 persona që kanë qenë në kontakt të drejtpërdrejtë ose të tërthortë me të ndjerën, ndërsa 189 prej tyre janë shtruar urgjentisht në spital. Sipas mediave të pavarura ruse, në Irkutsk nën karantinë të rreptë janë vënë tri spitale të qytetit, spitali për fëmijë „Ivano-Matreninskaya“ dhe një maternitet i qytetit. Një bashkëshorti nuk iu lejua të hynte në sallën e lindjes, edhe pse më parë e kishte rënë dakord dhe paguar lindjen me shoqërim - mjekët iu referuan drejtpërdrejt rrezikut nga murtaja.

Edhe më domethënëse: nga 1 tetori të gjitha ambulancat që i çojnë kontaktet për testim dhe izolim lëvizin nën shoqërimin e armatosur të patrullave të FSB-së. Në Kombinatin e Aluminit të Irkutskut në Shelekhov maskat janë të detyrueshme për të gjithë punëtorët, ndërsa drejtori Artyom Fominykh pranoi hapur se nëpër qytet qarkullojnë informacione kontradiktore. Administrata e qytetit fqinj Baikalsk në mëngjesin e 3 tetorit u bëri thirrje qytetarëve që përkohësisht të mos udhëtojnë në Shelekhov për shkak të një rasti të konfirmuar vdekjeje nga murtaja - e pastaj njoftimi u zhduk pa asnjë shpjegim.

Guvernatori Kobzev pohon se askush nga të shtruarit për momentin nuk ka simptoma dhe se testet janë negative. Ndoshta është kështu. Por kur FSB-ja i shoqëron ambulancat, ndërsa paralajmërimet fshihen nga kanalet zyrtare, është vështirë të besosh se situata është „e qëndrueshme“. U shfaqën edhe raportime se në rajon kishin mbaruar antibiotikët, kështu që banorët e frikësuar kërkonin ndihmë nëpër barnatore.

Murtaja pulmonare është forma më e rrallë, por edhe më e rrezikshme e infeksionit me bakterin Yersinia pestis. Ndryshe nga ajo bubonike - „Vdekja e Zezë“ mesjetare, e cila te njerëzit bartej kryesisht përmes kafshimit të pleshtave të infektuar të brejtësve - ajo pulmonare bartet drejtpërdrejt nga njeriu te njeriu, përmes pikëzave, si një grip i rëndë. Sipas Organizatës Botërore të Shëndetësisë, nëse antibiotikët nuk merren në 24 orët e para nga shfaqja e simptomave, vdekshmëria është pothuajse 100 për qind.

Kush e kujton Çernobilin e di se në një fatkeqësi të tillë më e rrezikshme shpesh nuk është vetë kërcënimi, por heshtja e pushtetit. A do ta thotë Moska çfarë ndodhi vërtet në Shelekhov, apo historinë do ta tregojnë spitalet e mbyllura?