16 години како минимална возраст за социјални мрежи во земијте на ЕУ – Европскиот парламент изгласа историски предлог

Европскиот парламент на денешната пленарна седница во Стразбур го усвои незаконодавниот предлог што предвидува зголемена заштита на малолетниците на интернет, вклучително и воведување минимална возраст од 16 години за пристап до социјални мрежи во целата Европска Унија. Резолуцијата беше усвоена со 483 гласа „за“, 92 „против“ и 86 „воздржани“, пренесува Ројтерс.

Предлогот повикува на хармонизирање на праговите за возраст низ сите земји членки на ЕУ: децата под 16 години да не можат да отворат профил на социјална мрежа, видео-платформа или мрежа со вештачка интелигенција без родителска согласност. Децата на возраст од 13 до 16 години би можеле да користат такви услуги само доколку родител потврди согласност.

Пратениците бараат и забрана на најштетните „адиктивни“ карактеристики – алгоритми дизајнирани да создаваат зависност, бескрајно скролање, нотификации што поттикнуваат прекумерно користење и други функции кои ја зголемуваат дигиталната зависност кај малолетниците. Резолуцијата дополнително бара стандардно да бидат исклучени сите такви опции за корисници под 18 години.

Парламентот ја потенцира загриженоста за растечката комерцијална експлоатација на децата на интернет. Платформите би требало да бидат спречени да нудат финансиски стимулации за „деца инфлуенсери“, а ЕУ треба итно да се справи со етичките и правните прашања што ги отвораат новите АИ алатки – од лажни вести до злоупотреба на длабоки фалсификати (deepfakes).

Иако предлогот не е обврзувачки, тој претставува силен политички сигнал до Европската комисија да подготви конкретни законски мерки. Иницијативата ја засилува тековната расправа во рамките на ЕУ, предводена од Грција и поддржана од Франција и Шпанија, за масовно ограничување на користењето на социјалните мрежи од страна на деца и тинејџери.

Воведувањето на минимална возраст од 16 години добива глобална поддршка. Откако Австралија прва најави таква мерка, истото го направија Малезија и Данска. Во ЕУ, Европската комисија веќе разгледува можни измени на постојните директиви во насока на ограничување на пристапот на корисници под 16 години.

Во „јазикот на Брисел“, директивата поставува цел што сите земји мора да ја постигнат, но им остава слобода сами да донесат национални закони за да се приближат до тие стандарди. Ако предлогот стане законска иницијатива, тоа би значело голема промена за милиони млади корисници во Европа и за платформите како TikTok, Instagram, YouTube и Snapchat.