OpenAI ги отвори вратите за многу повеќе од прашања за рецепти и есеи. Од петок, ChatGPT Pro корисниците во САД можат да си ги поврзат банкарските сметки со chatbot-от и да го прашуваат за сè – од анализа на трошењата до планирање за пензија. Пред две години, овие податоци не би ги дале ни на банкар. Денеска ги даваат на јазичен модел.

За поврзување се користи Plaid – финансискиот middleware кој веќе го користат Robinhood, Venmo и стотици други апликации. Преку него ChatGPT добива пристап до над 12.000 финансиски институции, вклучително Schwab, Fidelity, Chase, American Express и Capital One. По поврзувањето – dashboard со портфолио перформанси, претплати, претстојни плаќања.

Хронологијата е интересна. Пред еден месец OpenAI ги купи луѓето од стартапот Hiro, поддржан од Ribbit, General Catalyst и Restive. Според компанијата, нивната експертиза била клучна за лансирањето на овој производ – иако не велат дали тимот го изградил сè. Се планира интеграција и со Intuit, што ќе овозможи анализа на даночни импликации од продажба на акции или шанси за одобрување кредитна картичка.

Бројката што OpenAI ја истакнува: над 200 милиони корисници веќе го прашуваат ChatGPT финансиски прашања секој месец. Tоа не е истражувачки податок – тоа е признание дека луѓето одат на јазичен модел за финансиски совет, и сега компанијата едноставно ја формализира врската. Новиот GPT-5.5 модел, велат, е посилен во расудување со контекст – токму она што треба за пресметки и анализа на пари.

Привлечноста е јасна, ризиците исто. Овие податоци се можеби најосетливите што постојат – повеќе од медицинските, на одредени начини. OpenAI вели дека податоците ќе се бришат 30 дена по исклучување на сметка. Што се случува меѓу денот еден и денот 30, и каде сè стасуваат – тоа е она што правниците следните години ќе го пресечат на тенки парчиња. Perplexity и Anthropic веќе влегле во истиот простор. Не е прашање дали ова е тренд – туку колку време пред да се случи и првиот голем инцидент.