Додека возрасните политичари се караат околу војната во Украина од далечина, во Кавадарци некој направил нешто конкретно – им отворил врата на децата бегалци од таа војна. Група деца на возраст од 10 до 16 години пристигнаа на десетдневен одмор во детскиот одморалиште во Михајлово.

Престојот го организираа Општина Кавадарци, на чело со градоначалникот Митко Јанчев, и компанијата „Кожувчанка“, која обезбеди целосна финансиска и логистичка поддршка за хуманитарниот престој. Во реализацијата на програмата се вклучија повеќе локални институции, спортски клубови и здруженија од општината.

Програмата вклучува спортски активности и рекреација, културни настани и едукативна содржина, излети, прошетки и дружење со врсници. Целта е децата да си одморат од секојдневието на војна, да стекнат нови пријателства и да понесат убави спомени од Македонија.

Ова не е првпат Кавадарци да ги отвори вратите за украинските деца – оттука и „повторно“ во насловот. Во време кога солидарноста често се сведува на изјави и објави на социјалните мрежи, еден мал македонски град и една локална фирма покажуваат дека помошта може да биде и нешто сосема едноставно: десет дена мир за дете што дома го нема тоа.