Патот кон Теферич пропадна шест месеци по асфалтирањето, по осум месеци конечно се санира – а кој го градел, Општината не кажува

Осум месеци по пропаѓањето, на патот кон Теферич конечно се појавија камиони и багери. Жител на Теферич објави видео на кое се гледа механизацијата, а дел од улицата е веќе раскопан. Почна порамнувањето и санирањето на свлечиштето од коловозот.

Патот се оштети во февруари и оттогаш е затворен за сообраќај. Тоа се случи само шест месеци откако беше асфалтиран и обновен. Во март следуваше ново, посериозно пропаѓање и одвојување на земјиштето, што ги вознемири и жителите и целата јавност.

Дипломатот Љупчо Арсовски на социјалните мрежи напиша дека Владата се вратила на ветувањето оштетеното парче да се санира во ноември, и додаде: „Механизацијата е веќе активирана“, честитајќи им на Владата, на Александар Николовски и на министерот за сообраќај.

Кој го асфалтира патот што пропадна за шест месеци?

Добро е што се работи. Но едно прашање и понатаму виси над Теферич. Општина Кисела Вода ги нема објавено деталите за последната санација во 2025 година и не одговори на новинарските прашања која фирма ја извршила, кога бил објавен тендерот и кој вршел надзор над проектот. Тие прашања ги поставија и опозициските советници во Советот на Општината – и тие останаа без одговор.

Пат што пропаѓа шест месеци по асфалтирањето отвора прашања и за изведувачот и за надзорот. Сега санацијата ја презема Владата, а името на фирмата што ја направила претходната и понатаму е тајна. Дали некој ќе одговара – или ќе се сеќаваме само на тоа дека „конечно“ се поправи?