Скопјани со години му велат „ливада“. Тревникот на плоштадот „Македонија“ конечно се уредува – но приказната не почнува денес, туку со сметката од претходниот мандат.

Градоначалникот Орце Ѓорѓиевски преку социјалните мрежи објави дека е во тек целосно хортикултурно уредување на просторот и поставување ново зеленило.

„Запуштената површина на плоштадот „Македонија“, која граѓаните со години ја нарекуваа „ливада“, конечно добива нов и достоинствен изглед“, напиша тој, најавувајќи дека просторот ќе стане „мала зелена оаза“.

Заменети се и значително оштетените подни плочки по патеката кај Портата „Македонија“, а обновата на останатите оштетени делови продолжува следната недела. Во тек е и реновирање на подната фонтана.

„Наскоро, целиот овој простор повторно ќе претставува уредна, современа и привлечна целина, вистински излог на Скопје“, порача Ѓорѓиевски.

Второто уредување на истата површина

Овде вреди да се застане. Тревникот што сега се уредува е истиот што веќе еднаш бил уреден – во мандатот на Петре Шилегов.

Според пишувањата на медиумите што ја отворија темата, за тој тревник и десетина дрва тогаш се потрошени околу 500.000 евра, при што материјалната вредност на работата се проценува на 15.000 до 17.000 евра. Ова се тврдења изнесени во јавноста, не и утврдена сума од службен извештај – но разликата помеѓу двете бројки е доволно голема за да бара одговор, а не демант.

Ако едно уредување на иста површина издржало неколку години пред да треба второ, прашањето не е дали новото ќе биде поубаво. Прашањето е зошто првото не издржало, и дали некој воопшто ја проверил разликата помеѓу платеното и вграденото.

Второто уредување ќе биде фотографирано и објавено, како и првото. Ревизијата на првото – веројатно нема.