Ирански генерал излезе со тврдење што звучи како реплика од филм за третата светска војна – но го кажува по тринаесеттата ноќ американски напади врз Иран. Генералот Аболфазл Шекарчи изјави дека Вашингтон против Иран употребил „секоја способност, секое оружје и секое сценарио” што го чувал за судир со голема сила.

„Секое оружје тестирано низ светот, но никогаш употребено во вистинска војна, е искористено против нас. Секоја технолошка способност што Американците ја планирале и складирале за пресметка со големите светски сили, е донесена на бојното поле против нас”, тврди Шекарчи. Реторика на очај или признание дека Техеран е изненаден од силата на ударот – тешко е да се каже, но фактот е дека ударите траат веќе тринаесет ноќи по ред.

Ескалацијата ја крена цената на нафтата над 100 долари за барел за прв пат од мај. Хутите од Јемен ги засилија нападите врз саудиски бродови во Црвеното Море, што се заканува со дополнителни пречки на веќе стеснетите извозни рути за нафта низ теснецот Хормуз – точката низ која поминува значаен дел од светската нафта.

Трамп предупреди дека секоја штета врз бродови или товар ќе се плати од замрзнатите ирански средства и се закани дека ќе удри по иранската инфраструктура доколку Техеран нападне бродови во теснецот. Со други зборови – Вашингтон однапред ги наплатува сопствените закани од туѓи пари.

А додека големите играат војна на илјадници километри, сметката за скапата нафта не гледа граници. Дали поскапувањето ќе стигне и до нас? Балканот скоро секогаш го плаќа данокот на туѓите војни последен, но го плаќа. Прашањето не е дали, туку колку.