Просечната старосна граница за пензионирање во Европската Унија до крајот на 2060-тите ќе се искачи од 64,7 на 66,9 години за мажите и од 64 на 66,6 години за жените. Тоа е анализа врз основа на податоци на ОЕЦД од 32 земји, објавени во извештајот „Pensions at a Glance 2025″.

Зголемувања се планирани за мажите во 21 од анализираните држави, а за жените во 24. Значи, тоа не е исклучок – тоа е правило.

Данска до 74 години

Најдалеку оди Данска. Проекцијата за крајот на 2060-тите е граница од 74 години. Естонија оди на 71. Италија, Холандија, Шведска и Кипар на 70.

Најголемиот скок го прави Турција – од 52 години за мажите денес на 65, што е разлика од 13 години во еден потег. Данска додава седум, Естонија над шест, а Италија, Словачка и Кипар по пет и повеќе.

Денес највисока граница имаат Данска, Норвешка, Исланд и Холандија со 67 години за мажите.

Бројката што ја објаснува целата приказна

Во извештајот стои една реченица која вреди повеќе од сите табели: во просек во земјите на ОЕЦД, на секои 100 лица на возраст меѓу 20 и 64 години, бројот на лица над 65 години се проектира да порасне од 33 во 2025 година на 52 во 2050 година.

Со други зборови – помалку луѓе што внесуваат во фондот, повеќе луѓе што земаат од него. Математиката не бара идеологија за да се разбере.

Балканот ја знае оваа сцена, само од друга страна. Кај нас на демографскиот притисок се додава и тоа што цели генерации заминаа надвор, па нивните придонеси сега влегуваат во туѓи фондови. Дваесет и еден европски владин кабинет веќе седна и ја напиша непопуларната бројка на хартија. Дали кај нас некој ќе го стори истото пред да стане итно – или ќе чекаме проекцијата да пристигне сама?