Доналд Трамп зборува постојано, па тешко е некого да изненади. Овој пат успеа. Списанието Time го објави целосниот транскрипт од 75-минутниот разговор што со американскиот претседател го водеа дописникот Ерик Кортелеса и главниот уредник Сем Џејкобс – околу 11.000 зборови. На прв поглед, сè е познато: бескрајни реченици, фалење, навреди, неточности. Но меѓу нив се провлекуваат моменти на збунетост, неповрзан говор и параноја што тешко се прескокнуваат.

Почна уште со првото прашање. Трамп се пофали дека бил „претседател на турнирот во Чикаго, во Марион“. Голф-турнирот Presidents Cup всушност се играл во клубот Medinah во Илиноис. Трамп сфатил дека греши и се обидел да се поправи – „Всушност, тоа беше, да, Медина, во Медина, минатата година, Марион“ – само што тој турнир минатата година воопшто не се играл, бидејќи се одржува секоја втора година. А во Марион не се играл никогаш.

Ситница? Можеби. Но во 2024 година токму ваквите епизоди беа главниот аргумент дека Џо Бајден веќе не е способен за функцијата.

Војната што се развлече

Војната со Иран, која Трамп ја започна во февруари, трае повеќе од седум месеци, иако тој ветуваше дека ќе заврши за неколку недели. Досега загинаа најмалку 19 Американци и илјадници Иранци. Прашан зошто трае толку долго, Трамп рече дека „се држел до рокот“, но потоа „решил да оди понатаму“ – ескалација што никогаш не ја објасни пред граѓаните, а камоли да побара одобрување од Конгресот. За тоа што јавноста не разбира зошто војната се развлекла, ги обвини новинарите: „Мислам дека новинарите им го сервираа тоа.“

За Газа, каде Хамас и два месеци откако Трамп објави дека групата пристанала да се разоружа сè уште не го предал оружјето, одговорот гласеше вака: „Мислам дека веројатно ќе седнам во Ситуациската соба и ќе донесам соодветна одлука. Моите одлуки се исправни. Мислам, погледнете ја нашата земја… Некои би рекле дека тоа е војна, некои би рекле дека тоа всушност не е војна… ништо не се случи последните две недели, нели? И некој фрла бомба, и ништо не се случува.“ Израел, во меѓувреме, речиси секојдневно изведува смртоносни воздушни напади. По овој одговор никој не дозна ништо.

Сите се против него

Според Трамп, Федералните резерви ги кренале каматните стапки не за да ја зауздаат инфлацијата, туку единствено за да му наштетат нему политички. Стравувањата од вештачката интелигенција се „измама“, бидејќи „целата земја се темели на лажни работи“ – луѓето страдале од „синдромот на пореметеност од Трамп“. А за падот на поддршката кај гласачите: „Тоа се лажни бројки. Денес би го победил кој било противкандидат со 20 отсто разлика. Луѓето што прават анкети се корумпирани. Речиси исто толку колку и новинарите.“

Прашајте ги Кенеди и Џонсон

Врвот дојде кога Трамп сакаше да докаже дека војната во Иран е кратка во споредба со другите. „Зошто не ги прашавте Кенеди или Линдон Џонсон колку долго тие воделе разни војни?“, им рече на новинарите. Џон Ф. Кенеди и Линдон Џонсон се мртви со децении. Еден од новинарите мирно одговори: „Би ги прашал, да имав можност.“

Повеќето медиуми по објавувањето се фокусираа на тоа што Трамп ги изгубил нервите и со псовки викал по новинарите дека не му поставиле ниту едно позитивно прашање. Лесно е да се навикнеш на ова, бидејќи Трамп е секој ден во јавноста и неговите неповрзани изјави станаа позадинска бучава. Но тоа е умот што секој ден носи одлуки за живот и смрт, за војна и за бомби. Ако вака зборуваше кој било друг човек, околината веќе ќе се загрижеше за неговото здравје. Колку пати на Балканот сме гледале лидер на кого околината само му кима, наместо да праша дали е во состојба?