Понекогаш најубавата вест е најобичната. На битолското шеталиште се одржа четвртото издание на детската трка „Мини Трчај бе”, на која учествуваа повеќе од 800 деца – од Битола и од повеќе градови низ Македонија. Медали, насмевки и подиум на кој најмалите се чувствуваат како шампиони.

Градоначалникот на Општина Битола, Тони Коњановски, истакна дека ваквите настани се доказ дека иднината на градот добро се движи и дека децата се вистинските херои на Битола. Политичарите ваквите изјави ги даваат лесно, но во овој случај сликата ја поткрепува зборот – 800 деца што трчаат не се фотомонтажа за прес-конференција, туку реален настан што градот го организирал четврти пат по ред.

И токму тука е поентата што вреди да се забележи во земја каде што честопати се пишува само за она што не работи. Една редовна детска трка, што од година во година расте и станува препознатлив спортски настан, е токму она што му треба на еден град – континуитет, движење и причина децата да бидат надвор, не пред екран. Не секоја вест мора да биде скандал. Понекогаш доволно е 800 деца да претрчаат низ центарот за денот да биде подобар отколку вчерашниот.