Американската амбасадорка во Грција под истрага: го деградирала шефот на обезбедувањето затоа што во 4 часот наутро не се јавил кога барала мраз

Стејт департментот покрена истрага против американската амбасадорка во Грција, Кимберли Гилфојл. Според британскиот таблоид „Дејли мејл“, вработените во амбасадата нејзиниот мандат го опишуваат како „чиста тиранија“, а Канцеларијата на генералниот инспектор наводно ја проверува нејзината „потенцијална злоупотреба на опојни средства“, летањето со приватни авиони и хеликоптери, блиските врски со една енергетска и градежна фирма и примањето подароци.

Најсликовитата епизода доаѓа од Миконос. Според изворите на таблоидот, 57-годишната Гилфојл пиела во четири часот наутро и му се јавила на Василис, шефот на обезбедувањето, кој веќе е дедо. Тој, природно, спиел и не одговорил. Барала мраз. Наредниот ден го деградирала. На слична судбина наводно наишле и двајцата нејзини возачи, Петрос и Димитрис – отстранети затоа што не ѝ се допаднал „начинот на кој свртеле лево“, иако обуката ја поминале во САД.

Списокот барања што претходно излезе во јавноста е посебна приказна: бесплатни оброци, врвни вина и кошаркарско игралиште од 58.000 долари во резиденцијата во Атина. На првиот работен ден, според истите извори, во Атина стигнала со приватен авион на еден милијардер. Пред вработените, кои тврдат дека живеат во страв од отказ, наводно повеќепати повторувала: „Направи го тоа или леташ од работа“ – во оригиналот со многу посочен збор.

Сметка од 100.000 долари

Таблоидот не е единствениот извор на проблеми. „Волстрит џурнал“ во среда објави текст според кој Гилфојл од еден донатор на МАГА-движењето барала да ѝ плати сметка од кредитна картичка од 100.000 долари, нудејќи му за возврат влијание и пристап до луѓе од кругот на Доналд Трамп. Се споменува и нејзиното дружење со енергетскиот лобист Христос Марафацос.

Гилфојл, поранешна водителка на „Фокс њуз“, ја доби функцијата во Атина набргу откако во 2024 година ја раскина свршувачката со Доналд Трамп Помладиот, најстариот син на претседателот. Не е ни година на функцијата, а нејзиниот персонал, според сите овие извори, ја напушта амбасадата, додека таа во јули била забележана во ексклузивниот клуб Nammos на Миконос, а истиот месец ја посетила и Неделата на модата во Париз. Вработените наводно ја пријавиле и до грчката полиција за „вербално малтретирање“.

Амбасадорот како гувернер

Ништо од ова сè уште не е утврдено, а голем дел доаѓа од таблоид со позната репутација. Но кога истиот правец го потврдуваат и „Волстрит џурнал“ и отворена истрага на Стејт департментот, тешко е сè да се отпише како озборување. „Прашањето е колку уште ќе издржи“, изјавил за британскиот весник извор близок до Трамп.

На Балканот одамна навикнавме американските амбасадори да ги гледаме како нешто повеќе од дипломати. Грција е сојузничка земја, членка на НАТО и ЕУ, а сепак ја доби амбасадорката чие најпознато дело засега е деградирањето на возачи и чувари. Дали Вашингтон испраќа најдобри луѓе во регионот – или оние на кои им должи услуга?