Зеленски ја обвини Америка за „недостаток на волја“, а истиот ден протече дека Кушнер и Дмитриев разговарале за „Норд Стрим“

Украинскиот претседател Володимир Зеленски ја изгуби дипломатската трпеливост кон Вашингтон. Од Прилуки, градот каде што ден претходно руски удар врз станбена зграда однесе 22 животи, тој директно ги обвини Соединетите Американски Држави дека имаат моќ да го натераат Путин на преговори, но немаат волја да го направат тоа.

Поводот беше изјавата на американскиот државен секретар Марко Рубио, кој од Португалија оцени дека војната во Украина стигнала до „опасен застој“. Зеленски ја отфрли таа оцена со реченица што се памети: „Не можете од една страна да преговарате со Русите за идни економски проекти, а од друга да зборувате дека сме во некаков дипломатски ќорсокак.“

Рецептот што го понуди е краток: „Уништете ја целата економија на Путин. Замолчете ја Русија. Престанете да ги храните со своите продажби. Едноставно воведете санкции против нивното оружје.“ Побара и поширок пристап до сателитскиот систем Starlink – и потсети дека Америка тоа веќе го направила кога одговарала на Иран. „Каде е тука вистината, каде е чесноста? Каков ќорсокак? Тоа се вика недостаток на волја“, додаде.

Гасоводи, Кушнер и Дмитриев

Критиките не дојдоа во вакуум. Истиот ден агенцијата Ројтерс, повикувајќи се на свои извори, објави дека американски и руски претставници разгледуваат можност американски инвеститори да влезат во гасоводите „Норд Стрим“ – оние по кои рускиот гас пред инвазијата стигнуваше во Германија. Во разговорите, според истите извори, учествувале Џаред Кушнер, зетот на Доналд Трамп, и Кирил Дмитриев, близок соработник на Путин.

Белата куќа тврди дека вакви разговори за „Норд Стрим“ во последно време немало. Останува нејасно колку Вашингтон воопшто е заинтересиран за обнова на руските испораки до Германија – проект што би удрил во ѕид од американски и европски санкции. Но доволна е и самата информација дека зетот на претседателот и човекот на Путин зборувале за гасоводи, додека државниот секретар зборува за „застој“, за да се разбере зошто во Киев гледаат две различни политики под исто знаме.

78 мртви за два дена

Зеленски ги изнесе бројките: во руските напади за два дена загинале 78 луѓе, а 215 се ранети. Во Краматорск загинаа најмалку 30 луѓе, ден претходно во Прилуки 22. Најави дека нападите нема да останат без одговор.

Сепак, по сите остри зборови, украинските преговарачи во петок и сабота заминуваат во САД на нови разговори. Рубио, пак, порача дека Вашингтон е подготвен да посредува, но „нема да учествува во бесмислени процеси ако нема напредок“ – и предупреди дека ескалацијата може да се прелее и во други европски земји, вклучително и членки на НАТО.

Зеленски е категоричен дека Европејците сами не можат да го притиснат Путин, а Американците можат повеќе. „Верувам дека претседателот Трамп може да направи повеќе и, искрено, би требало, со оглед на огромните загуби“, рече тој. Земја под бомби што бара од голема сила да ги искористи своите лостови, додека големата сила пресметува инвестиции – Балканот таа сцена ја знае напамет. Колку уште мртви ќе стојат меѓу американскиот „застој“ и украинската „волја“?