Од полноќ, дизелот поскапе за 4,50 денари и стигна на 98,50 денари за литар. Еуросупер БС-95 е на 93 денари, БС-98 на 95. Истиот тој ден, на светските берзи, нафтата „Брент” падна на 85,7 долари за барел – речиси три отсто пониско од претходниот ден. Американската WTI падна на 80 долари.

Значи: во светот поевтинува, кај нас поскапува. Регулаторната комисија за енергетика има објаснение и тоа е точно – новите цени се пресметуваат врз просекот од претходната недела, а претходната недела „Брент” беше на 100 долари.

Ветувањето за следната недела

Премиерот Христијан Мицкоски, прашан во Илинден, вети дека следната недела очекува „поголемо намалување” на цените. За акцизите и ДДВ-то одлука ќе се носи на владина седница на 4 август, по затворањето на втората половина од јули.

„Знаете дека на секои две недели ги анализираме акцизите. Сега ја завршуваме втората половина од месецот, па во понеделник ќе го пресметаме просекот за втората половина и врз основа на тие параметри ќе дејствуваме кон цените на нафтените деривати”, изјави Мицкоски.

На прашањето дали ќе интервенира и со ДДВ-то, одговорот беше исто одложување: „Веќе интервениравме еднаш со акцизите, сега чекаме да се затвори 31 јули, втората половина од месецот, така пишува во законот, и дури тогаш ќе воведеме дополнителни мерки.”

Механизмот што секогаш доцни во една насока

Двонеделниот пресек е законски и е ист во двата правца. Но потрошувачот го чувствува асиметрично: кога берзата расте, поскапувањето стигнува со две недели задоцнување и веќе е тука. Кога берзата паѓа, поевтинувањето исто така доцни две недели – само што дотогаш тој веќе точел по повисока цена.

Во март горивата беа префрлени од редовната стапка на ДДВ од 18 отсто на повластена од 10 отсто. Тоа е мерка што веќе е потрошена. Следната интервенција, ако дојде, ќе го намали приходот во буџетот и нема да ја отстрани изложеноста кон берзата – само ќе ја амортизира еднаш.

Мицкоски тврди дека Македонија има убедливо најниски цени на дизел и безоловен бензин во регионот и во Европа. Според споредбите, Грција и Албанија имаат најскап бензин, а Албанија и Србија најскап дизел. Најниска цена во регионот и најниска цена по џеб не се иста работа – зависи од тоа со колку се влегува во таа пресметка.