Синоќа околу 22:30 часот, на патничко возило „пежо“ со струмички таблички му го препречиле патот полициски службеници во село Муртино, струмичко. Внатре – тројца млади мажи од соседното село Банско, на возраст од 24 до 31 година. При прегледот, велат од полицијата, се појавиле кокаин и марихуана.

Тројцата се задржани во Полициската станица Струмица. Следниот ден, врз основа на судска наредба, инспекторите влегле и во домот на еден од приведените во Банско, каде повторно пронашле марихуана. Известен е и јавен обвинител од Струмица, а по документирањето на случајот следува кривична пријава.

Приказната сама по себе е рутинска – уште една ноќна контрола, уште едно пронајдено пакетче. Но токму затоа е важна. Струмичко со години се спомнува како еден од коридорите низ кои дрогата патува кон север, а бројот на вакви „случајни” наоди на локалните патишта не е случаен. Секое апсење е доказ дека нешто се движи низ теренот – прашањето што ретко се поставува е кој стои над улуичните препродавачи.

Кокаинот, да потсетиме, не е евтина стока за џебот на дваесетгодишник од провинцијата. Кога тој завршува во возило на локален пат кај Муртино, тоа значи дека некаде постои мрежа што го внесува, го дистрибуира и наплаќа. Полицијата фати тројца. Дали ќе стигне и до оние што им ја дадоа стоката во раце – тоа е вистинската мерка дали ова е удар врз трговијата или само уште еден заплен за статистиката.