Телефонот ѕвони. На линија е „лекар” со итни вести: ќерката ти доживеала несреќа во странство, тешко е повредена, операцијата чини – парите се потребни веднаш, сега. Постара жена во паника не размислува двапати. И така, две пензионерки во Врање и Лесковац останаа без илјадници евра, динари и злато. А зад измамата – двајца државјани на Македонија, сега уапсени во Србија.

Во Врање, 70-годишна жена му предала поголема сума на човек што дошол пред нејзиниот дом, откако телефонски ја убедиле дека ќерка ѝ е тешко повредена. Осомничениот, Р.Ш. роден 1977, бил запрен во текот на ноќта на граничен премин кон Македонија – во возилото му пронашле пари во евра и динари. Иако жртвата ниту го пријавила случајот, полицијата сепак стигнала до него.

Во Лесковац приказната е уште поконкретна. С.Г., роден 1995, наводно измамил 75-годишна жена која му предала 2.650 евра, 120.000 динари и златен накит – убедена дека ќерка ѝ имала сообраќајна несреќа. Овојпат имало и среќен крај: полицијата го фатила осомничениот во близина на домот на жената, а сите пари и накитот ѝ биле вратени.

Оваа измама не е нова – позната е низ цел Балкан под неколку имиња, но механизмот е секогаш ист: се цели на најранливите, на старите луѓе што живеат сами и што за своето дете би дале сѐ. Тоа што овојпат измамниците се Македонци што работеле преку граница само го подвлекува колку овие мрежи не познаваат држава.

Српската полиција повторно апелира – особено повозрасните да не наседнуваат на вакви повици и секој сомнителен телефонски разговор веднаш да го пријават. Совет добар, но недоволен. Затоа што додека постојат осамени баби до чиј телефон никој друг не се јавува, ќе постои и некој што ќе го злоупотреби тоа. Прашањето е дали институциите ги учат старите како да се одбранат – или само им кажуваат дека било доцна.