Мицкоски: Без консензус нема промени во преговарачката рамка со ЕУ

Премиерот Христијан Мицкоски повторно ја повлече истата црвена линија: не очекува промени во преговарачката рамка со Европската унија, бидејќи таа, како што вели, може да се смени само со консензус. Превод – без согласност од сите страни, ништо не мрда.

Изјавата доаѓа во моментот кога македонско-бугарскиот јазол повторно се затегнува. Мицкоски порача дека Бугарија треба да ги повлече амандманите со кои бара додефинирање на македонскиот идентитет во Европарламентот за да може да му се верува на ветувањето дека нема да блокира. Од друга страна, новата бугарска дипломатија тврди дека рамката од јули 2022 е европски консензус од кој нема отстапување.

Срцето на спорот останува исто со години: дали уставните измени за вклучување на бугарското малцинство треба да бидат услов пред напредокот кон ЕУ. Софија инсистира дека мора; Скопје бара гаранции за заштита на идентитетот и јазикот. Двете страни велат „консензус”, а мислат спротивни нешта.

И тука е суштината што граѓанинот ја чувствува на своја кожа. Деценија подоцна, истата сцена – ние чекаме на врата од ЕУ како на шалтер во општина, а условот секогаш се менува штом ќе се приближиме. Прашањето веќе не е кој е во право во оваа конкретна расправа, туку колку долго уште „консензус” ќе биде убаво име за блокада.