OpenAI размислува за тужба против Apple. Според Bloomberg, компанијата на Сем Алтман веќе ангажирала надворешна правна канцеларија која ги мапира опциите – кои не мора да започнат со јавна тужба, ама може да заврши со официјална нота за прекршување на договорот.

Кавгата е стара речиси две години. Партнерството помеѓу двете компании беше објавено на WWDC во јуни 2024 година – ChatGPT интегриран во Siri и во Visual Intelligence функцијата на iPhone. OpenAI очекуваше милијарди долари нови претплатници и одлично место во еден од најкористените мобилни екосистеми во светот. Не се случи.

Според извори блиски до OpenAI, интеграцијата била буквално закопана во менијата на Apple, тешка за пронаоѓање, и приходите од неа далеку под проектираните. Apple, од своја страна, не седи тивко – имаат свои поплаки, вклучително и грижи за приватноста на OpenAI и иритираност од нивниот сè поагресивен влез во хардвер, проект кој го води поранешниот шеф за дизајн на Apple Џони Ајв.

Историјата на Apple со партнери е поучна. Google Maps беше клучна функција на оригиналниот iPhone додека Apple не ја извади во 2012 и не ја замени со сопствениот Apple Maps производ – толку слаб што Тим Кук мораше јавно да се извинува. Adobe Flash ја уништи Стив Џобс со едно отворено писмо во 2010 година. Spotify се борел години со App Store правилата и завршил со фина против Apple од 1,8 милијарди евра од Европската комисија во март 2024.

Иронично, додека OpenAI готви правна акција, Google станува главниот AI инфраструктурен партнер на Apple. Во јануари беше потпишан повеќегодишен договор за Gemini моделите да ја движат следната генерација на Apple Intelligence. Apple плаќа околу 1 милијарда долари годишно. Истиот Google кој беше истеран од iPhone пред 14 години, сега се враќа како најголем партнер. OpenAI, во меѓувреме, оди кон судница.

Прашањето не е дали Apple може да има партнери. Прашањето е дали некој воопшто може да остане партнер на Apple подолго од потребно. Историјата вели: не баш.