Околу 3 часот наутро на 19 мај, дел од мостот на граничниот премин Стара Градишка (Хрватска) и Босанска Градишка (БиХ) се сруши. Никој не беше повреден, но премитот – еден од најпрометните на регионот – е затворен до понатамошно известување.

Хрватскиот авто-клуб (HAK) потврди дека целиот сообраќај е суспендиран. Аеро-снимките од местото покажуваат сериозно структурно оштетување – целиот еден дел од патот пропаднал, а оградата паднала прва. Како точно се случило – истрагата ќе одговара. Како тоа дека еден од најкористените мостови меѓу две земји паднал во среде ноќта без претходно предупредување – тоа е прашањето за кое граѓаните бараат одговори, а инспекциите им должат.

Возилата веднаш беа пренасочени кон соседните премини – Костајница, Козарска Дубица и Градина. Чекањето во првите часови беше од 10 до 30 минути, но властите очекуваат значително подолги задршки во текот на денот. За транзитниот сообраќај помеѓу Балканот, Централна Европа и северниот Јадран – ова е удар во моментот кога летната туристичка сезона веќе почна.

Балканската инфраструктура старее без план. Мостовите, патиштата и железничките рути – сите наследени од Југославија – се одржуваат стихијно, со интервенции наместо со долгорочна стратегија. Кога ќе падне еден мост, се гради заобиколна рута, се ставаат знаци. Систематски преглед на безбедноста на сите мостови? Тоа е друг буџет, друга политичка волја – и со време секогаш помалку приоритет.

Прашањето кое мора да го поставиме е тривијално но неудобно: колку мостови во Македонија, Србија, БиХ, Косово, Албанија последен пат биле сериозно проверени на статичка стабилност? Одговорот никој не сака да го кажува. Затоа мостовите паѓаат во ноќта – и ние се будиме со чудење.