По речиси 19 години двојни имиња на улиците, Уставниот суд ја поништи одлуката со која Советот на Општина Тетово во 2007 година ги преименуваше улиците, плоштадите, мостовите и јавните објекти во градот. Причината е едноставна и стара колку и самата одлука – општината го направила тоа без согласност од Владата, што законот го бара.

Резултатот од таа недоследност го живеат тетовци секој ден: општинските документи користеа едни имиња, а државните документи – лични карти, пасоши – други. Деветнаесет години административен хаос затоа што еден совет одлучил сам, без да ја заврши процедурата до крај.

Меѓу спорните преименувања беа булеварот и плоштадот „Маршал Тито” во „Илирија”, улицата „ЈНА” во „Дервиш Цара” и улицата „29 Ноември” во „Мехмет Паша Дерала”. Уставната иницијатива ја поднесоа во февруари 2025 година Даријан Сотировски и Здружението на борците од НОБ – Тетово.

Зад имињата на улиците отсекогаш стоела политика, тоа не е тајна никаде на Балканот. Но поентата на оваа одлука не е кое име е „правилно” – туку дека ниту една власт, локална или централна, не смее да прескокне процедура и да остави граѓаните 19 години да живеат со две вистини во два различни документа. Кој ќе одговара за тие изгубени две децении?