Прилеп собра над 6.000 литри вода за Гостивар: Солидарноста беше побрза од институциите

Додека едни расправаат чија е вината за водата во Гостивар, Прилеп собра над 6.000 литри флаширана вода и ја испрати таму каде што е најпотребна. Понекогаш солидарноста е побрза од институциите.

Градоначалникот на Прилеп, Дејан Проданоски, информираше дека градот во заедничка акција собрал и испратил повеќе од 6.000 литри флаширана вода како помош за граѓаните на Гостивар, кои деновиве се соочуваат со проблеми во водоснабдувањето.

Во акцијата се вклучиле голем број граѓани, Црвениот крст – Општинска организација Прилеп, општествено одговорни компании, здруженија, институции, политички субјекти и бројни луѓе кои сакале да помогнат. „Во моменти на предизвик, нашиот град повторно докажа дека знае да биде рамо за поддршка, да сплоти и да делува заеднички“, порача Проданоски.

Гестот е вреден за почит и не му треба дополнителна анализа. Но зад топлата приказна стои и една студена вистина: граѓаните од еден град собираат вода во шишиња за граѓаните од друг град, во држава каде водоснабдувањето би требало да е основна работа на институциите, а не на хуманитарни акции. Прилеп ја заврши својата работа. Прашањето е зошто некој воопшто мораше.