Моторот на европската економија кашла, и тоа гласно. Германските автомобилски гиганти – Volkswagen, BMW и Mercedes-Benz – започнуваат најголемото преструктуирање во својата историја, со отпуштања што се мерат во десетици илјади работни места.

Бројките се сурови. Volkswagen планира да укине до 100.000 работни места од вкупно околу 625.000 вработени и да затвори четири фабрики во Германија до 2030 година. BMW предвидува до милијарда евра трошоци за преструктуирање и можно укинување на 10.000 работни места, со намалување на европското производство за 15 проценти. Mercedes-Benz ги откажа летните бонуси, имаше 5.500 доброволни заминувања и притиска за враќање на 40-часовна работна недела.

Причината има име и презиме: кинеската конкуренција. За првпат, кинеските производители како BYD и Chery во мај заедно зазедоа над 10 проценти од европскиот пазар, додека Германците губат удел и покрај вкупниот раст на продажбата на континентот од четири проценти.

За Балканот ова не е далечна вест. Германската автомобилска индустрија е директен или индиректен работодавец за илјадници луѓе во регионот – преку фабрики за делови, кооперанти и нашинци што работат таму. Кога Volkswagen кива, цел синџир на снабдување од Скопје до Штип може да настине. Прашањето е дали некој кај нас воопшто го следи тоа што се случува, или ќе нè затече како и секогаш – неподготвени.