Корупцијата, сивата економија и нефункционалната администрација – тоа се трите најголеми пречки за бизнисот на Западен Балкан. Не го вели тоа некоја невладина организација однадвор, туку претседателот на Стопанската комора Бранко Азески, и тоа од Брисел, пред 500 претставници на европски институции, бизнис заедницата и граѓанскиот сектор.

Азески настапи на дебата за проширувањето на ЕУ во организација на Европскиот економско-социјален комитет. Според истражувањата на кои се повика, повеќе од 90 отсто од компаниите во регионот токму овие три фактори ги посочуваат како најголема пречка за развој на бизнисот и за нови инвестиции. Кон нив тој ги додаде и неразвиената гасна и транспортна инфраструктура и слабостите во владеењето на правото.

Пораката е неудобно точна затоа што доаѓа однатре. Кога бизнисмен што со децении работи во регионот вели дека корупцијата и сивата економија го кочат растот, тоа не е политичка нарација – тоа е дијагноза од човек што ги плаќа последиците. И тоа е разликата меѓу извештаите на Брисел, кои лесно се отфрлаат како туѓо мешање, и зборовите на некој од нашиот двор.

Азески нагласи дека интеграцијата на Западен Балкан во ЕУ мора да оди заедно со конкретни реформи што создаваат предвидливи услови за работење и овозможуваат побрзо приближување до европскиот пазар. Комесарката за проширување Марта Кос пак повтори дека проширувањето останува стратешки приоритет на Унијата.

Стратешки приоритет – фраза што ја слушаме со години, додека процесот стои. Проблемот, како што покажува и самиот Азески, не е само во Брисел. Тој е и тука, во институциите што треба да ги спроведат реформите за кои сите зборуваат, а малкумина ги прават. Дали власта навистина сака предвидливи услови за бизнис, или предвидливоста ѝ пречи на некои други интереси?