Tabela informative në hyrje të Shkupit - ajo me fotokolazhin dhe mbishkrimin „Mirë se erdhët në Shkup / Welcome to Skopje" - sërish është objekt i debatit politik. Këtë herë jo për shkak të kalit me pesë këmbë që më parë e kishte kthyer fotografinë në objekt talljeje, por për shkak të diçkaje që mungon: gjuhës shqipe.

Nga BDI akuzojnë se Qyteti i Shkupit brenda vetëm një dite dy herë e shkeli detyrimin ligjor për përdorimin e gjuhës shqipe. Shkupi, kujtojnë ata, është qytet dygjuhësh, dhe institucionet e tij kanë detyrim të qartë ligjor ta përdorin shqipen në komunikimin zyrtar - ndërsa tabela në hyrje qëndron vetëm në maqedonisht dhe në anglisht.

Por shigjeta kryesore e opozitës nuk drejtohet nga qyteti, por nga një institucion që, thonë, duhet të reagojë, e hesht: Inspektorati për përdorimin e gjuhëve. „Ky institucion është formuar pikërisht për t'i konstatuar shkeljet dhe për të shqiptuar masa. Në krijimin e tij janë investuar vite pune, kuadër dhe trajnime", thonë nga BDI - dhe kërkojnë dorëheqjen e menjëhershme të drejtorit, kuadër i partisë Vlen.

Sipas opozitës, heshtja e Inspektoratit i inkurajon drejtpërdrejt shkelësit dhe e kthen përjashtimin e gjuhës shqipe në praktikë institucionale. Prandaj, përveç dorëheqjes, kërkojnë edhe përgjegjësi ligjore për të gjithë ata që shkelën Ligjin për përdorimin e gjuhëve.

Pas përplasjes partiake qëndron një pyetje që i kalon komunikatat e përditshme. Inspektorati ekziston, ligji ekziston, detyrimi ekziston - por nëse institucioni i themeluar për ta zbatuar ligjin hesht kur ligji shkelet më dukshëm, në tabelën në vetë hyrjen e qytetit, atëherë për çfarë shërben? Një tabelë mund të ndërrohet për një ditë, ashtu siç u ndërrua bilbordi me kalin pas kritikave. Një institucion që nuk vepron është problem më i rëndë, dhe nuk rregullohet me një vulë të re.