Битола повторно под вода: еден порој, петнаесет критични точки низ градот

Попладневен дожд – и Битола повторно под вода. Поројот в понеделник попладне ги претвори улиците во речни корита и го наруши нормалното функционирање на градот: атмосферската мрежа, како што признаа и од Општината, не можеше да ја прими количината вода што се истури одеднаш.

Списокот на интервенции на ЈП „Нискоградба” се чита како адресар на пола град: населба Стрелиште кај бензинската на улица „8 Септември”, Карпош-Кланица кон „Железничка”, самата „Железничка” кај „Император”, „Партизанска” пред Медицина на трудот, улиците „Бурса” и „Цар Самоил”, Горно Оризари со одводниот канал и Раштанскиот поток, Курделес во „Стрчин”, стариот Курделес кај „Васко Карангелевски”, па „Бадембалари”, „Баир” и „Широка”, каде што решетките не ја собрале водата од ридот. Машините остануваат на терен, а екипите интервенираат и на патиштата кон селата Раштани, Брусник и Лавци.

Од Општината велат дека сите расположливи екипи излегле веднаш и работат до нормализација, со апел до возачите за претпазливост. Тоа е во ред – луѓето на терен си ја вршат работата, и тоа во дожд.

Но прашањето што се наметнува само е друго: колку пати истите адреси треба да се појават во ваков список за поплавувањето да престане да биде „изненадување” и да стане проект? Решетки што не ја собираат водата од ридот не се временска непогода – тоа е инфраструктурен наод. Колку чинат интервенции по секој дожд, а колку би чинело еднаш да се реши одводот?

Краткотрајните поројни врнежи стануваат сè почеста слика на летото – тоа го кажува личното искуство на секој Битолчанец. Градската инфраструктура или ќе се прилагоди, или „изненадувањето” ќе се повторува со секоја летна бура. Дотогаш: чизми, трпение и екипите на „Нискоградба” на терен.